Qyzylordada eńbek ınspektsııasyna shaǵym nege kúrt kóbeıdi
QYZYLORDA. KAZINFORM – Memlekettik eńbek ınspektsııasy Komıtetiniń Qyzylorda oblysy boıynsha departamentine júginetinder sany edáýir artty.
Byltyr bul kórsetkish 946 bolsa, bıyl 6 aıda 1425-ke jetip otyr. Mamandardyń aıtýynsha, buǵan zııandy jaǵdaıda jumys isteıtin azamattardyń 5%-dyq jarnapuldy talap etýi, jeke mektep, balabaqsha qyzmetkerleri tarapynan ótinishtiń kóbeıýi sebep bolyp otyr.
– Osyǵan baılanysty tekserý sany 14,6%-ǵa artty. Tekserý nátıjesinde byltyr jarty jylda 151 kemshilik anyqtalsa, bıyl ol 289-ǵa jetti, ıaǵnı 19,1%-ǵa kóp. 15,1%-ǵa artyq nusqama berilip, 7,7 mln teńge nemese byltyrǵydan 11,3%-ǵa joǵary aıyppul salyndy, – dedi departament basshysy Bektemir Jumaǵulov.
Departament profılaktıkalyq baqylaý fýnktsııasyn qosa atqarady. Byltyr qandaı mekemeler men kásiporyndarǵa qatysty aryz-shaǵym kóp tústi, sonda profılaktıkalyq baqylaý júrgizedi. Bıyl mundaı baqylaý sany da eselengen.
Eńbek ujymdaryndaǵy ahýal atalǵan vedomstvonyń basty nazarynda.
– Bul – oblystyń qoǵamdyq-saıası ahýalyna tikeleı áser etetin faktorlardyń biri. Jyl basynan beri birqatar kásiporyn jumysshylarynyń talaby oryndaldy. «PetroQazaqstan Qumkól Resorsız» kompanııasy jumysshylarynyń talabymen olardyń jalaqysy 12,3%-ǵa ósti. «Araltuz» aktsıonerlik qoǵamynyń qyzmetkerlerinen eńbek jaǵdaıyn jaqsartýǵa baılanysty birneshe tarmaqtan turatyn aryz-shaǵym túsken edi. Olar zııandy eńbek jaǵdaıynda jumys istegeni úshin sút, aıran, arnaıy kıim-keshek berilýi kerek talap qoıdy. Odan bólek, qosymsha eńbek kestesi bekitilmegeni, eńbek demalysynyń ýaqytyly berilmegeni anyqtaldy. Máseleler qalpyna keldi, – deıdi aımaqtyń bas memlekettik eńbek ınspektory.
Onyń aıtýynsha, «Qýat Amlon munaı» kompanııasynyń jumysshylarynan da eńbek jaǵdaıyn jaqsartýǵa qatysty birneshe shaǵym túsken. Tekserý barysynda basshylyqtyń túngi aýysymdaǵy jumysshylardy qysqartqany anyqtalypty.
– Kúndizgi jáne túngi aýysymǵa eki túrli tarıfpen jalaqy tólenetini belgili. Jumysshylardyń janaıqaıy oblys ákimine jetip, quzyrly memlekettik organdardyń aralasýymen sheshimin tapty. «Qamqor» lokomotıv seriktestiginiń Aral aýdanynyń Sekseýil jáne Qazaly aýdanynyń Áıteke bı kentterindegi fılıaldarynda jumysshylardyń talaby oryndalyp, jalaqy 10%-ǵa kóterildi, – dedi Bektemir Jumaǵulov.
Buǵan deıin biz Soltústik Qazaqstan oblysynda qazirgi ýaqytta eńbekaqyny ýaqtyly tólemeý faktileri resmı tirkelmegenin jazdyq.
