Qyzylordada elimizdegi úshinshi Prezıdenttik kitaphananyń irgetasy qalandy
QYZYLORDA. KAZINFORM – Ulttyq kitap kúni Qyzylorda oblysynyń ákimi Nurlybek Nálibaev, kásipker-metsenat Edýard Ogaı, Qazaqstannyń Eńbek Eri Abzal Eralıev jáne quqyq qorǵaý organdarynyń basshylary, zııaly qaýym ókilderiniń qatysýymen elimizdegi úshinshi Prezıdenttik kitaphananyń irgetasyn qalaý rásimi ótti.
Aımaq basshysy jınalǵan jurtshylyqty 23 sáýir – Ulttyq kitap kúnimen, kitaphanashylardyń kásibı merekesimen jáne jańa kitaphana qurylysynyń bastalýymen quttyqtady.
– Ózderińizge belgili, Memleket basshymyz ótken jyly aımaǵymyzǵa jumys saparymen kelgende Astana men Almaty qalalaryndaǵydaı táýlik boıy qyzmet kórsetetin úshinshi Prezıdenttik kitaphananyń Qyzylorda qalasynda ashylatynyn jetkizgen bolatyn. Jerlesterimiz bul bastamany zor qýanyshpen qabyldady.
Búgin Ózderińizben birge aımaǵymyz úshin mańyzdy jobalardyń biri – bilim men mádenıettiń altyn dińgegine aınalatyn Prezıdenttik kitaphananyń kapsýlasyn salý rásiminde bas qostyq. Mańyzdy jobany júzege asyrýǵa demeýshilik kórsetken elimizge belgili kásipker-metsenat Ogaı Edýard Vıktorovıchke barsha Syr jurtshylyǵynyń atynan shynaıy alǵysymdy, zor rızashylyǵymdy bildiremin.
Demeýshilikpen 20 mlrd. teńgege salynatyn, aýmaǵy 13 myń sharshy metr, sáýletti, jańa kitaphana zamanaýı talaptarǵa saı bolady. Ǵımaratta oqý, konferents, basylym, arhıv pen sırek qorǵa arnalǵan zaldar, elektrondyq kitaphana, álem ádebıeti bólimi men óner galereıalary, kórme, kovorkıng ortalyqtary, qalpyna keltirý sheberhanasy qarastyrylǵan. Bul – halyqtyń rýhanı damýyna, kitap oqý mádenıetin jańa deńgeıge kóterýge baǵyttalǵan Prezıdentimizdiń qoldaýy.
Jańa nysan tek kitaptar jınalǵan jer emes, ultymyzdyń tarıhyn, mádenıeti men órkenıetin dáripteıtin, jerlesterimizdiń rýhanı tynysyn ashatyn tárbıe men taǵylym úıi bolmaq! Jańa kitaphananyń qurylysy sátti aıaqtalyp, el ıgiligine qyzmet etip, ult rýhanııaty men biliminiń órkendeýine úles qosýyna tilektespin, - dedi Nurlybek Mashbekuly.
Saltanatty rásim kezinde Edýard Vıktorovıch, Qazaqstan Jazýshylar jáne Jýrnalıster odaǵynyń múshesi Shákızada Ábdikárimov sóz sóıledi.
Aıta ketý kerek, 2022 jyldan beri óńirde 22 mádenıet nysany jańadan salynyp, el ıgiligine berildi. Barlyq aýdanda «Rýhanııat ortalyqtary» ashyldy. Oblystyń bas shaharynda «Óner ortalyǵy», «Anaǵa taǵzym», «Otbasy ortalyǵy», «Oqýshylar saraıy» boı kóterdi.
Byltyr Qyzylordanyń astana bolǵanyna 100 jyl tolýyna oraı oblystyq tarıhı-ólketaný mýzeıiniń, Assambleıanyń 30 jyldyǵyna oraı «Qazatomónerkásip» kompanııasynyń qoldaýymen «Dostyq úıiniń» jańa ǵımaraty salyndy.
Keıingi jyldary «Syr juldyzdary» akademııasy, Jalaǵash, Jańaqorǵan, Shıeli aýdandarynda «Óner mektebi» men «Oqýshylar úıi» iske qosyldy.
