Qyzylordada elimizdegi alǵashqy «Quzyrettilik ortalyǵy» ashyldy
QYZYLORDA. KAZINFORM — Búgin Ulystyń uly kúni qarsańynda Qyzylordada oblys ákimi Nurlybek Nálibaev, quqyq qorǵaý organdarynyń birinshi basshylary, máslıhat depýtattary men zııaly qaýym ókilderi, barlyq aýdannan kelgen delegattardyń qatysýymen elimizdegi alǵashqy «Quzyrettilik ortalyǵy» ashyldy.
Oblys ákimdigi baspasóz qyzmetiniń málimetinshe, aımaq basshysy óńirdegi serpindi jobalarǵa toqtalyp, jańa ortalyq el ıgiligine qyzmet etetinine senim bildirdi.
— Naýryznama boıynsha búgin — Jańarý kúni. Aıtýly merekede Memleket basshymyzdyń tapsyrmasymen salynǵan tehnıkalyq jáne kásiptik bilim berýdi damytýǵa arnalǵan sáýletti, jańa zamanaýı «Quzyrettilik ortalyǵyn» el ıgiligine tabystaýdamyz. Qalamyzǵa kórik beretin jańa, ásem ǵımaratymyz qutty bolsyn!
Memleket basshymyz Qasym-Jomart Kemeluly «Qoǵamnyń túrli salasyn bilikti mamandarmen qamtamasyz etý — asa ózekti mindet. Bul — ekonomıkany damytý jáne ınvestıtsııalyq tartymdylyqty arttyrý úshin qajetti bastama» dep atap ótti. Ótken jyly Prezıdentimiz «Jumysshy mamandyqtar jyly» aıasynda óńirlerde «Quzyrettilik ortalyǵyn» salýdy tapsyrǵan bolatyn. Elimizde balamasy joq, biregeı ortalyq respýblıka boıynsha alǵashqy bolyp aımaǵymyzda boı kóterdi. Ortalyq bıznes, tehnıkalyq jáne kásiptik bilim berý uıymdaryna arnalǵan ortaq alań bolady. Jumysshy mamandyqtar mártebesin kóterip, qoǵamda eńbek adamdaryn tanymal etýge, dárejesin kóterýge, eń úzdik qoǵamdyq jáne óndiristik dástúrlerdi anyqtap mártebeleýge, jastardy kásibı eńbekke baýlýǵa baǵyttalǵan ortalyq el ıgiligine qyzmet ete bersin! Jumysshy mamandyqtarynyń baǵalanýy — bul eldiń áleýmettik-ekonomıkalyq, mádenı damýyna oń áser etetin mańyzdy qadam, — dedi ákim.
Nálibaevtyń sózinshe, aımaqta bilim berý salasyna 2022-2025 jyldary 1 trln 159 mlrd teńge, bıyl 302 mlrd 196 mln teńge qaraldy.
— 2022 jyldan beri 43 jańa zamanaýı bilim berý nysany salynyp, paıdalanýǵa berildi. Barshańyzdy qalamyzǵa tańǵajaıyp kórik bergen, zamanaýı sáýletimen erekshelenetin «Quzyrettilik ortalyǵy» ǵımaratynyń saltanatty ashylýymen shyn júrekten quttyqtaımyn, — dedi ol.
Basqosýda bilim berý salasynyń damýyna eleýli úles qosqan ustazdar men jańa nysannyń qurylysyn merziminde aıaqtaǵan merdiger mekeme qyzmetkerleri oblys ákiminiń Alǵys hatymen marapattaldy.
Memleket jáne qoǵam qaıratkeri Murat Baqtııaruly, Qorqyt Ata atyndaǵy Qyzylorda ýnıversıtetiniń basqarma tóraǵasy — rektory Naýryzbaı Baıqadamov sóz sóılep, turǵyndarǵa quttyqtaýyn jetkizdi.
Aıta keteıik, eki qabatty, 1000 oryndyq jańa ǵımarat kezinde zańsyz syrtqa ketken aktıvter esebinen qarjylandyryldy.
Ortalyq stýdentterdi halyqaralyq kásibı sheberlik jarystaryna daıarlaý, sarapshylyq qaýymdastyqty damytý, jumysshy mamandyqtarynyń tanymaldyǵyn, jastardyń jumysshy kásibine degen qyzyǵýshylyǵyn arttyrý jónindegi biryńǵaı jattyǵý bazasyna aınalady.
Óńirdegi jumysshy quzyrettilikteri boıynsha jastardyń kásibı daǵdylaryn qalyptastyryp, pedagogterdiń, jas mamandardyń ozyq tehnologııalarmen jumys isteýine, eńbek naryǵynda suranysqa ıe maman bolyp qalyptasýyna mol múmkindik beredi.
Jańa zamanaýı ǵımarat respýblıkalyq, halyqaralyq, deńgeıdegi forýmdar, konferentsııalar, semınarlar men kórmeler ótkizýge de beıimdelgen.