Qyzylordada elektrondy bilezik taqqandardyń qandaı shekteýlerdi jıi buzatyny belgili boldy
QYZYLORDA. KAZINFORM — Qyzylorda oblysynda probatsııa qyzmetiniń esebinde turǵan azamattardy elektrondy bilezikter arqyly baqylaý tıimdiligin kórsetip otyr.
Oblystyq qylmystyq atqarý júıesi departamentiniń málimetinshe, jyl basynan beri osy qurylǵylardyń kómegimen 104 quqyqbuzýshylyq anyqtalǵan.
— Onyń ishinde 97 jaǵdaıda sottalǵandardyń túngi ýaqytta belgilengen mekenjaıynan ruqsatsyz ketkeni tirkelse, 4 derek probatsııa qyzmetiniń kelisiminsiz ákimshilik aýmaqtan shyqqan azamattarǵa qatysty. Al 3 jaǵdaıda elektrondy bilezik búlingen, — delingen habarlamada.
Elektrondy bilezikter jazany óteý tártibin birneshe ret buzǵan, shartty túrde sottalǵan nemese qoǵamdyq qaýipsizdikke qaýip tóndirýi múmkin azamattarǵa qoldanylady.
— Bul qurylǵylar táýlik boıy baqylaý júrgizýge jáne sot júktegen mindetter men shekteýlerdiń oryndalýyn qadaǵalaýǵa múmkindik beredi. Jyl basynan beri probatsııalyq baqylaýdaǵy 24 sottalǵan jazany óteý tártibin qaskóılikpen buzǵan. Sol úshin sotqa olardyń jazasyn bas bostandyǵynan aıyrý jazasyna aýystyrý usynyldy, — dep habarlady departamenttiń baspasóz qyzmeti.
Departament tarapynan probatsııa esebindegi sottalǵandardy qoǵamǵa beıimdeý, olardyń zań talaptaryn saqtaýyn qamtamasyz etý jáne qaıtalanǵan quqyqbuzýshylyqtardyń aldyn alý baǵytyndaǵy jumys jalǵasyn tappaq.
Eske salaıyq, budan buryn Qyzylordada probatsııa esebindegi sottalǵan elektrondy baqylaý qurylǵysyn masań kúıde úzip tastaǵanyn habarlaǵan edik.
