Qyzylordada ekstrokorporaldy uryqtandyrý kvotasy 8 ese ósti

QYZYLORDA. KAZINFORM — «Ańsaǵan sábı» baǵdarlamasy aıasynda bıyl Qyzylorda oblysyna 310 ekstrokorporaldy uryqtandyrý kvotasy bólindi.

Búginge deıin 285 áıel protsedýradan ótýge joldandy. Bul týraly oblystyq densaýlyq saqtaý basqarmasynan habarlady.

2015 jyldan bastap berilgen kvota sany 8 ese ósken. Mysaly, osydan on jyl buryn oblysqa nebári 34 kvota bólinse, ótken jyly bul kórsetkish 270-ke jetti.

— 270 kvota jyl sońyna deıin tolyqtaı ıgerildi. Onyń 65,9%-y júktilikpen, 38,2%-y túsikpen aıaqtalǵan. Ókinishke qaraı, kvota berilgen 85 áıelde nemese jalpy áıelderdiń 31,5%-nan nátıje shyqpaǵan. Byltyr ekstrokorporaldy uryqtandyrý arqyly 92 bala dúnıege keldi. 3 otbasynyń egiz sábıleri bar. Al 51 áıel qazirgi kezde júkti, — dedi basqarma basshysynyń orynbasary Maıa Myrzanova.

Búginde óńirde urpaq órbitý jasyndaǵy áıelder sany 175 myńǵa jýyqtaıdy. 6300-den astam otbasy bedeýlik problemasymen betpe-bet kelip otyr. Sonyń ishinde áıelder úlesi basym — 60,4%. Osy kúni bala súıý baqytyn sezingisi keletin 455 otbasy kvota kezeginde tur.

— Barlyǵynyń ótinishi óńirlik komıssııada qaralyp, qoldanystaǵy buıryqtarǵa sáıkes joldanady. Arnaıy baǵdarlama sheńberinde EKU tsıklderine monıtorıng júrgizý, patsıentterdiń qujattaryn qabyldaý jáne qurylǵan komıssııaǵa usyný jumystary basqarma tarapynan júrgiziledi. Patsıentterdi emdeý úshin kvota bólýdi taldaý jáne uryqtandyrýǵa joldama berýdi arnaıy komıssııa sheshedi, — dedi Maıa Myrzanova.

Al jýyrda Astanada «Bedeýlikti emdeýdiń zamanaýı tásilderi. QRT: búgini men bolashaǵy» taqyrybyndaǵy Qazaqstannyń reprodýktıvtik medıtsına qaýymdastyǵynyń XVII Halyqaralyq kongresi ótti.