Qyzylordada ekologııalyq ınfraqurylymdy kúsheıtýge 26 tehnıka berildi
QYZYLORDA. KAZINFORM — Búgin Botanıkalyq saıabaqta oblys ákimi Murat Ergeshbaevtyń qatysýymen «Taza Qazaqstan» respýblıkalyq ekologııalyq baǵdarlamasy aıasyndaǵy keń kólemdi tazalyq aktsııasy ótti.
Aýqymdy aktsııaǵa oblys boıynsha 17694 adam qatysty. Olardyń qatarynda zııaly qaýym ókilderi, oblystyq máslıhat depýtattary, basqarma, departament jáne ınspektsııa basshylary, «AMANAT» partııasynyń ókilderi, memlekettik mekeme qyzmetkerleri, jastar uıymdary men ekobelsendiler boldy.
— Memleket basshymyz Qasym-Jomart Kemeluly: «Tazalyq — órkenıetti qoǵamnyń aınasy, damýǵa umtylǵan kez kelgen eldiń myzǵymas ustanymy», — degen bolatyn. Qorshaǵan ortany qorǵaý, ony kútip ustaý tek memlekettiń ǵana emes, ár azamattyń mindeti jáne qoǵamnyń ortaq negizgi qundylyqtardyń biri bolýy tıis. Óńirimizde sanıtarlyq tazalyq, abattandyrý, turǵyndardyń ómir súrýine qolaıly jaǵdaı jasaý baǵytynda keshendi jumystar qarqyndy júrgizilip jatyr. Qyzylorda qalasyndaǵy ortalyq alań, qalalyq mádenı-demalys parki jáne Qorqyt ata skveri, búgingi sharamyz ótip jatqan Botanıkalyq saıabaq qaıta jańǵyrtylyp, paıdalanýǵa berildi. Óńirimizde dızaın kod bekitilip, oblys ortalyǵynan bastap barlyq eldi mekender biregeı arhıtektýralyq talaptarǵa sáıkestendirildi. Oblys ortalyǵyndaǵy 80-nen asa eski kópqabatty turǵyn úıdiń qasbetteri zamanaýı panelmen qaptaldy. Bıyl da bul jumystar jalǵasyn taýyp, qosymsha 21 turǵyn úı jańǵyrtýdan ótýde, — dedi aımaq basshysy.
Іs-sharada qorshaǵan ortany qorǵaýǵa jáne tazalyq jumystaryn turaqty júrgizýge úles qosqan 100 qyzmetker marapattaldy. Ekologııalyq ınfraqurylymdy nyǵaıtý maqsatynda salalyq mekemelerge 26 arnaıy tehnıka tabystaldy. Onyń ishinde qaldyq tasymaldaýshy kólikter, órt sóndirý tehnıkalary, traktorlar jáne kishi órt sóndirý keshenderi bar.
Botanıkalyq saıabaq aýmaǵy kógaldandyrylyp, 500 túp qylqan japyraqty aǵash otyrǵyzyldy. Bul jumystar óńirdi jasyl jelekke bóleýge, aýa sapasyn jaqsartýǵa jáne qala turǵyndary úshin qolaıly ekologııalyq orta qalyptastyrýǵa baǵyttaldy.
«Taza Qazaqstan» baǵdarlamasy sheńberinde oblystyń barlyq eldi mekeninde bir mezgilde aýqymdy senbilik jáne abattandyrý jumystary uıymdastyryldy.
Oblys ákimi Botanıkalyq baq aýmaǵynda ornalasqan Qorqyt ata atyndaǵy Qyzylorda ýnıversıtetiniń bastamasymen qolǵa alynǵan jylyjaı jumysymen tanysyp, oqytýshylarymen pikir almasty.
Jylyjaıda kókónis ósiriledi.
Aıta ketý kerek, jyl basynan beri óńirdegi ekologııalyq sharalarǵa 121 992 adam, ıaǵnı eriktiler, qoǵam qaıratkerleri, bıýdjet salasynyń jáne kásiporyn qyzmetkerleri belsene qatysty.
Osy ýaqyt aralyǵynda 3 030 tonnaǵa jýyq turmystyq qaldyq shyǵarylyp, 3 367 skver men park, 256 tarıhı-mádenı eskertkish, 1 019 áleýmettik nysan, 669 ónerkásip jáne bıznes nysany, 210 sý obektisi jáne 5 383 kóshe boıy tazartyldy. Bul jumystarǵa 548 arnaıy tehnıka jumyldyryldy.
Sonymen qatar, jyl basynan beri oblys aýmaǵyna jergilikti klımatqa beıimdelgen 88 567 túp aǵash kósheti otyrǵyzyldy. Olardyń qatarynda qaraǵash, terek, Syr taly jáne basqa da kóshet túrleri bar.
Búgingi aktsııa — óńirdegi ekologııalyq mádenıetti damytýǵa, tabıǵatty qorǵaýdy júıeli jolǵa qoıýǵa jáne turǵyndardyń qorshaǵan ortaǵa degen jaýapkershiligin arttyrýǵa baǵyttalǵan mańyzdy bastama.
