Qyzylordada ekologııa talabyn buzǵandarǵa 14,8 mlrd teńge aıyppul salyndy

QYZYLORDA. KAZINFORM – Qyzylorda oblystyq Ekologııa departamentiniń qyzmetkerleri bıyl 10 aıda 46 sýbektige tekserý júrgizip, 100-ge tarta ekologııalyq zańbuzýshylyqty anyqtady.

Qorshaǵan ortany qorǵaý salasyndaǵy zańbuzýshylyqtarǵa baılanysty ákimshilik is qozǵaldy. Jeke jáne zańdy tulǵalarǵa 14,8 mlrd teńge kóleminde aıyppul salynyp, onyń 42,5 mln teńgesi óndirildi.

- Zańsyz karerlerdi anyqtaý, zerttep-qaraý, monıtorıng jumystaryn júrgizý, osy baǵytta tıisti sharalar qabyldaý úshin quqyq qorǵaý jáne múddeli memlekettik organdardyń qatysýymen birlesken reıdtik is-sharalar júrgizilip keledi. Atalǵan shara qorytyndysymen keń taralǵan paıdaly qazbalardy zańsyz óndirýdiń 15 deregi anyqtaldy. Quqyq buzýshylarǵa barlyǵy 2 mln teńge kóleminde ákimshilik aıyppul salyndy, - delingen departament habarlamasynda.

Al jaqynda tabıǵat qorǵaý prokýratýrasynyń tapsyrmasy boıynsha Aqtóbe oblystyq ekologııa departamenti «Intergaz Ortalyq Azııa» AQ-y fılıalynyń qyzmetine tekserý júrgizgen bolatyn.