Qyzylordada ekologııa talabyn buzǵan kásiporyndarǵa 3,5 mln teńgeden asa aıyppul salyndy
QYZYLORDA. KAZINFORM — Qyzylorda oblystyq ekologııa departamenti osy jyldyń 6 aıyndaǵy zerthanalyq-taldamaly baqylaý nátıjesin jarııalady.
Soǵan sáıkes lastaýshy zattardyń shekti ruqsat etilgen kontsentratsııasy normatıvten asyp ketken 118 derek belgili boldy.
— Topyraq, sý jáne atmosferalyq aýanyń lastanýyna baılanysty 10 ákimshilik quqyqbuzýshylyq faktisi anyqtalyp, ákimshilik aıyppul salyndy. I jáne II sanattaǵy kásiporyndar óndiristik ekologııalyq baqylaý nátıjesi boıynsha 326 esep usyndy. Ony taldaý barysynda anyqtalǵan sáıkessizdikter boıynsha oblystyq tabıǵat qorǵaý prokýratýrasymen birge 20 sýbektige qatysty Ákimshilik quqyqbuzýshylyq týraly kodekstiń 325-baby boıynsha ákimshilik is qozǵaldy. Jalpy somasy 3 546 500 teńge kóleminde ákimshilik aıyppul salyndy, — delingen habarlamada.
Departament ókilderi atmosferalyq aýa men sý obektileri boıynsha joǵary lastaný jáne ekstremaldy joǵary lastaný jaǵdaılary tirkelmegenin alǵa tartyp otyr. Bul óńirdegi ekologııalyq ahýaldyń turaqty ekenin kórsetedi.
— Qorshaǵan ortany saýyqtyrý jónindegi keshendi jospar men «Taza aýa» is-sharasy aıasynda 44 avtokólikke zerthanalyq baqylaý júrgizildi. Nátıjesinde lastaýshy zattar shyǵaryndylary belgilengen normatıvten asyp ketken faktiler tirkelgen joq. Syrdarııa ózeni basseınindegi 7 baqylaý núktesinen synama alynyp, 22 lastaýshy zat boıynsha zerthanalyq anyqtaý júrgizildi. Nátıjesinde júzgin zattar boıynsha normatıvten 1,4 ese asý jaǵdaıy tirkeldi. Júzgin zattar kontsentratsııasynyń joǵarylaýy Syrdarııa ózeniniń transshekaralyq sıpatyna, joǵarǵy aǵys bóliginen keletin laı aǵyndarǵa, sondaı-aq ózen arnasyndaǵy tabıǵı gıdrologııalyq protsesterge baılanysty. Qalǵan komponentter boıynsha normatıvten asý derekteri anyqtalǵan joq, — dep málimdedi vedomstvo.
Eske salsaq, Qyzylorda oblystyq ekologııa departamenti 2026 jyldyń 1 jartysynda qorshaǵan ortany qorǵaý salasynda 37 sýbektige baqylaý sharalaryn uıymdastyrdy.
