Qyzylordada eki jasóspirimdi ótkir zatpen jaraqattaǵan kúdikti qolǵa tústi

Qyzylorda qalasynda eki jasóspirimge ótkir zatpen dene jaraqatyn salyp, oqıǵa ornynan qashyp ketken kúdikti qolǵa tústi, dep habarlaıdy Kazinform.

Oblys ortalyǵyndaǵy Y.Jaqaev kóshesinde beıtanys azamattar kámelet jasyna tolmaǵan jasóspirimderge kelip, ózara janjaldasyp qalǵan.

​Onyń biri eki jasóspirimge ótkir zatpen dene jaraqatyn salyp, oqıǵa ornynan qashyp ketken.

Jábirlenýshilerge medıtsınalyq kómek kórsetildi. Oqıǵa ornyna kelgen jedel-tergeý toby kúdiktiniń jeke basyn anyqtady.

«Jedel izdestirý sharalarynyń nátıjesinde buryn sottylyǵy bar 19 jastaǵy azamat ustaldy. Kúdikti ýaqytsha ustaý ızolıatoryna qamaldy. Atalǵan derek boıynsha QR Qylmystyq kodeksiniń 293-babynyń 3-bóligine (Buzaqylyq) sotqa deıingi tergep-tekserý júrgizilýde. Saraptama taǵaıyndaldy. Oqıǵanyń mán-jaıy anyqtalyp jatyr», — dep málim etti Qyzylorda qalalyq polıtsııa basqarmasynan.

Atalǵan bap boıynsha kúdiktige qatysty úsh jyldan jeti jylǵa deıingi merzimge bas bostandyǵyn shekteýge nemese sol merzimge bas bostandyǵynan aıyrýǵa jazasy kózdelgen.

Eske salsaq, budan buryn Qyzylordada joq kólikterdi satqan 27 jastaǵy áıel ustalǵan edi.