Qyzylordada eki kúnde 29 sheteldik el aýmaǵynan shyǵaryldy

QYZYLORDA. KAZINFORM — Zańsyz kóshi-qonnyń aldyn alý jáne ony boldyrmaý, sheteldikterdiń kóshi-qon zańnamasyn buzý faktilerin anyqtaý maqsatynda 17-20 naýryz aralyǵynda oblys aýmaǵynda «Mıgrant» jedel-profılaktıkalyq is-sharasy ótip jatyr. 

Oblystyq polıtsııa departamentiniń baspasóz qyzmeti habarlaǵandaı, is-sharanyń eki kúninde 172 quqyqbuzýshylyq anyqtaldy.

— Onyń ishinde shetel azamattary tarapynan 53 ákimshilik quqyqbuzýshylyq tirkelip, 29-y el aýmaǵynan shyǵaryldy. Sheteldikterdiń Qazaqstanda bolý erejeleriniń saqtalýyn qamtamasyz etpegen Qazaqstan Respýblıkasynyń 63 azamatyna qatysty ákimshilik sharalar qoldanyldy, — delingen habarlamada. 

Polıtsııa oblys turǵyndarynan shet memleketterden jumys isteýge kelgen azamattardyń zańda belgilengen merzimde qujatyn rásimdep, kóshi-qon zańnamasynyń talaptaryn saqtaýdy surap otyr. Olaı bolmaǵan jaǵdaıda el zańnamasyna sáıkes tıisti sharalar qoldanylatynyn eskertti. 

Al Túrkistan oblysynda reıdtik is-shara kezinde kóshi-qon zańyn buzýdyń 300-den asa deregi tirkeldi.