Qyzylordada eki kúnde 132 kólik aıyp turaǵyna qoıyldy

QYZYLORDA. KAZINFORM – Qyzylorda oblysynda nebári eki kúnde 132 kólik aıyp turaǵyna qoıylyp, 52 avtokóliktiń memlekettik nómiri alyndy.

Bul — «Quqyqtyq tártip» jedel profılaktıkalyq is-sharasy kezinde anyqtalǵan derek.

Oblystyq polıtsııa departamentiniń baspasóz qyzmeti habarlaǵandaı, eki kún ishinde 756 ákimshilik quqyqbuzýshylyq anyqtaldy. Onyń ishinde qoǵamdyq oryndarda spırttik ishimdik ishýdiń 44, usaq buzaqylyqtyń 11, mas kúıde temir tulpar tizgindeýdiń 4, túngi tynyshtyqty buzýdyń 17 deregi esepke alyndy.

QR ÁQBtK-niń 441-babyna sáıkes kalıan tutynǵany úshin 6 adam ákimshilik jaýapkershilikke tartyldy.

«Reıd barysynda kámelet jasyna tolmaǵandarǵa qatysty 77 ákimshilik quqyqbuzýshylyq tirkeldi. 12 ata-anaǵa ákimshilik shara qoldanyldy», - delingen habarlamada.

Jyl basynda Aqorda Ákimshilik quqyq buzýshylyq týraly kodekske ózgeris engizetin zańnyń maquldanǵanyn habarlady.