Qyzylordada egizderdiń basym bóligi oblys ortalyǵynda dúnıege kelgen

QYZYLORDA. KAZINFORM — Qyzylorda oblysynda ótken jyly azamattyq hal aktilerin tirkeý salasy boıynsha 25 095 qyzmet kórsetildi. Bul 2024 jylmen salystyrǵanda 1 268-ge az.

«Azamattarǵa arnalǵan úkimet» memlekettik korporatsııasy Qyzylorda oblystyq fılıalynyń málimetine súıensek, onyń ishinde 16 310 týý týraly kýálik berilip, 4 655 qaıtys bolý deregi tirkeldi.

— 3 792 erli-zaıyptynyń nekesi tirkelip, 338 erli-zaıyptynyń nekesi buzyldy. Erekshe atap ótetin jaǵdaılardyń biri — Jalaǵash aýdanynda ótken jyldyń qorytyndysy boıynsha AHAJ salasynda neke buzý jaǵdaılary tirkelmegen, — delingen habarlamada.

Byltyr óńirimizde 108 egiz jáne 1 úshem dúnıege keldi.

— Egizderdiń basym bóligi oblys ortalyǵynda tirkelse, eń sırek tirkelgen aýdandar qatarynda Syrdarııa jáne Qarmaqshy aýdandary bar, — delingen fılıal taratqan málimette.

Qyzylorda qalasyndaǵy Otbasy ortalyǵy men aýdan ortalyqtaryndaǵy neke qııý zaldarynda zeınetaqy, týý, neke jáne jeke bas kýálikterin saltanatty túrde tabystaý boıynsha 5 126 rásim ótkizildi.

Aıta keteıik, «Azamattarǵa arnalǵan úkimet» memlekettik korporatsııasynyń baspasóz qyzmeti elde Jańa jyl qarsańynda qıylǵan neke týraly qyzyqty statıstıkany usyndy.