Qyzylordada drıft jasap, jol erejesin buzǵan eki júrgizýshi jazalandy
ASTANA. KAZINFORM — Áleýmettik jelilerge júrgizilgen monıtorıng barysynda polıtsııa qyzmetkerleri quqyqqa qaıshy beınejazbany anyqtady.
Oqıǵa Qyzylorda qalasy aýmaǵynda bolǵan. BMWjáne Lexus avtokóliginiń júrgizýshileri bir orynda kólikti aınaldyryp, drıft jasaǵan.
Tártip saqshylary beınejazbany zerdelep, quqyq buzýshylardyń jeke basyn anyqtady. Olar 20 jastaǵy Qyzylorda qalasynyń turǵyndary ekendigi anyqtaldy. Eki quqyq buzýshyǵa qatysty 13 ákimshilik hattamalar rásimdeldi.
Naqtylasaq, manevr jasaý qaǵıdalaryn buzý, qaýipsizdik beldigin taqpaý, sondaı-aq tehnıkalyq jaǵdaıy qaýipsizdik talaptaryna sáıkes kelmeıtin jáne paıdalanýǵa tyıym salynatyn aqaýlary bar kólikti basqarǵan.
Sonymen qatar kólikti toqtatý jáne toqtap turý qaǵıdalaryn buzyp, ári jol qozǵalysyna basqa qatysýshylarǵa kedergi keltirip, avarııalyq jaǵdaı týǵyzǵan. Quqyq buzýshylardyń birinde kólik basqarýǵa quqyǵy bolmaǵan.
Usaq buzaqylyq jasaǵany úshin sot sheshimimen eki quqyq buzýshy 5 táýlikke ákimshilik qamaýǵa alyndy.
Aıta ketelik Aqtóbede ákimdik aldynda drıft jasaǵan júrgizýshige aıyppul salynǵan edi.
