Qyzylordada drama teatrlarynyń respýblıkalyq festıvali bastaldy
QYZYLORDA.KAZINFORM – Qyzylorda qalasynda teatr synshysy, professor Baǵybek Qundaqbaevtyń 100 jyldyǵyna arnalǵan Qazaqstan drama teatrlarynyń XXXI respýblıkalyq festıvali bastaldy.
Oblystyq mádenıet,arhıvter jáne qujattama basqarmasy habarlaǵandaı, festıvaldiń shymyldyǵy qyzyl kilem ústindegi sherýmen túrildi. Іs-sharaǵa qazylar alqasynyń músheleri, qurmetti qonaqtar men elimizdiń ár óńirinen kelgen teatr ujymdary qatysty.
– Saltanatty jıynda Qyzylorda oblysy ákiminiń orynbasary Qaırat Nurtaı quttyqtaý sóz sóılep, qazaq teatrtaný ǵylymynyń damýyna ólsheýsiz úles qosqan kórnekti ǵalym, professor Baǵybek Qundaqbaevtyń shyǵarmashylyq murasy men ulttyq teatr ónerindegi aıryqsha ornyn atap ótti. Baǵybek Qundaqbaevtyń qyzdary Gúljámıla men Kúlıpa Baǵybekqyzyna shapan jabýyp, gúl shoqtaryn usynyp, erekshe qurmet kórsetti. Merekelik baǵdarlama jergilikti ónerpazdar men teatr ártisteriniń qatysýymen ótken kontserttik baǵdarlamaǵa ulasty, – delingen habarlamada.
Іs-shara aıasynda qurmetti qonaqtar Baǵybek Qundaqbaevtyń ómiri men shyǵarmashylyq jolynan syr shertetin fotosýretter, eńbekteri men teatrtaný salasyna qosqan úlesin aıshyqtaıtyn qundy materıaldar qoıylǵan kórmeni tamashalady.
– Óner merekesinde alǵash bolyp І.Omarov atyndaǵy Qostanaı oblystyq qazaq drama teatry óner kórsetti. Teatr ujymy Mirjaqyp Dýlatulynyń ómir joly men ult azattyǵy jolyndaǵy kúresin beıneleıtin «Mirjaqyp» dramasyn sahnalady. Tarıhı tulǵanyń taǵdyryn arqaý etken qoıylym kórermenge ult tarıhyn tereńirek tanýǵa múmkindik berip, eldik murat pen rýhanı qundylyqtardyń mańyzyn jetkizdi, – dep habarlady basqarmadan.
Uıymdastyrýshylar festıval teatr óneriniń damýyna serpin berip, ulttyq sahna mádenıetiniń úzdik úlgilerin nasıhattaýǵa jol ashady dep esepteıdi. Respýblıkalyq is-shara 24 qazanǵa deıin jalǵasady.
Al jýyrda Atyraýda Rahymjan Otarbaev atyndaǵy ІІІ halyqaralyq teatr festıvali ótti.
