Qyzylordada «Dombyra – halyq murasy» atty mádenı is-shara ótti
QYZYLORDA. KAZINFORM — Búgin Prezıdent saıabaǵynda Ulttyq dombyra kúnine oraı «Dombyra – halyq murasy» atty aýqymdy mádenı-buqaralyq is-shara ótti. Oǵan oblys ákiminiń birinshi orynbasary Danııar Janalınov qatysyp, jurtshylyqty Ulttyq dombyra kúnimen quttyqtady.
— Memleket basshysy Qasym-Jomart Kemeluly: «Bul merekeniń qazaq rýhanııaty úshin mán-mańyzy zor. Qasterli aspap dala órkenıetiniń ajyramas bóligine aınaldy. Tól mádenıetimizdiń qundy qazynasyn saqtaý — barshamyzdyń paryzymyz», — dep búgingi merekeniń mańyzyn ashyp kórsetken bolatyn.
Bul — babalar únin, Uly Dalanyń sarynyn urpaqtan urpaqqa jetkizgen dombyrany ulyqtaıtyn, uly murattarǵa bastaıtyn mereke.
Qurmetti qala turǵyndary men qonaqtary, qadirmendi ónersúıer qaýym!
Halqymyzdyń qasıetti ulttyq aspaby — dombyra tórimizden túspesin! — dedi.
Merekelik baǵdarlama saıabaqtyń amfıteatryndaǵy saltanatty kontsertten bastaldy. Kórermenge Turmaǵanbet atyndaǵy halyq aspaptar orkestri, oblystyq fılarmonııa ánshileri, kúni keshe ótken «Syr tolqyny» ІІІ respýblıkalyq kúıshiler konkýrsyna qatysqan ónerpazdar, jetekshi shyǵarmashylyq ujymdar men dástúrli oryndaýshylar óz ónerin usyndy.
Sonymen qatar, saıabaq aýmaǵynda «Ulttyq óner — uly qazyna» atty mamandandyrylǵan kitap jáne mýzeı jádigerleriniń kórmesi uıymdastyrylyp, kelýshilerge sırek kezdesetin tarıhı eksponattar men ádebı muralar tanystyryldy.
Kreatıvti ındýstrııa ókilderi men jergilikti qolónershilerdiń ónimderi qoıylǵan kórme-jármeńkede kásibı dombyra jasaýshy sheberler aspap ázirleýdiń qyr-syryn úıretetin sheberlik saǵattaryn ótkizdi.
Sondaı-aq jastar arasynda taqyryptyq fleshmob uıymdastyrylyp, ulttyq sport oıyndarynan jarystar ótti. Oryndaýshylar men ónersúıer qaýymnyń basyn qosqan erkin formattaǵy «Dombyra Party» mýzykalyq jobasy da merekeniń kórkin qyzdyrdy.
