Qyzylordada dınozavrdyń súıegi tabyldy

QYZYLORDA. KAZINFORM — Qyzylorda oblystyq tarıhı-ólketaný mýzeıiniń mamandary Shah-Shah shatqalynan tabylǵan qaldyqtar Bor dáýirindegi dınozavrlardyń súıegi bolýy múmkin ekenin aıtady. Sebebi buǵan deıin de bul mańnan mundaı qaldyqtar tabylǵan. Bul týraly oblystyq tarıhı-ólketaný mýzeıi jarııalady.

Oblystyq murajaı men Qarmaqshy aýdandyq tarıhı-ólketaný mýzeıiniń qyzmetkerleri aýdan terrıtorııasyndaǵy Shah-Shah shatqalyna barlaý ekspedıtsııasyn uıymdastyrdy.

Keshende alǵash ret 1959 jyly orys paleontology A.Rojdestvenskııdiń jetekshiligimen ǵylymı-zertteý jumystary júrgiziledi. Boztóbe svıtasynda ornalasqan shatqaldan Mezozoı erasynyń Bor kezeńinde ómir súrgen dınozavrlardyń súıekteriniń qaldyqtary tabylady. 1968 jyly bas súıegi ǵana tabylǵan dınozavr «Aralozavr» degen ataýmen ǵylymı aınalymǵa enedi.

— Paleontologtardyń zertteý jumystary barysynda gadrozavr otrıadyna kiretin Aralozavr 93-86 mln jyl buryn ómir súrgeni anyqtalady. Keıin bul aımaq eýropalyq paleontolog-ǵalymdardyń qyzyǵýshylyǵyn týdyryp, álemdik ǵylymı jýrnaldarǵa maqalalar jarııalanady, — delingen aqparatta.

Ekspedıtsııa nátıjesinde Shah-Shah shatqalynan Bor dáýirinde ómir súrgen tirshilik ıeleriniń súıekteriniń qaldyqtary tabyldy. Aldaǵy ýaqytta paleontologııalyq buıymdar arnaıy mamandar tarapynan zertteledi.

Osyǵan deıin Tájikstanda 85 mıllıon jyldyq dınozavrdyń qaldyqtary tabylǵan bolatyn.