Qyzylordada DDU-nyń Aral teńizi máseleleri jónindegi óńirlik keńsesi ashylady
QYZYLORDA. KAZINFORM – Qyzylorda oblysynda DDU-nyń Aral teńizi máseleleri jónindegi óńirlik keńsesi ashylady. Bul týraly QR Densaýlyq saqtaý mınıstrliginiń baspasóz qyzmeti habarlady.
Mundaı sheshim Dúnıejúzilik densaýlyq saqtaý uıymy, BUU ókilderiniń, sondaı-aq Qazaqstan, Ózbekstan jáne Qaraqalpaqstan basshylarynyń qatysýymen ótken keńestiń qorytyndysy boıynsha qabyldandy.
Qatysýshylar ekologııalyq ózgeristerdiń aýqymyn jáne olardyń adam densaýlyǵyna, klımatqa jáne bıoártúrlilikke áserin talqylady.
Kezdesý qorytyndysy boıynsha mańyzdy sheshimder qabyldandy.
Atap aıtqanda:
– Qyzylordada DDU-nyń Aral teńizi máseleleri jónindegi óńirlik ofısin ashý;
– memleketaralyq deńgeıdegi is-qımyldardyń jol kartasyn daıyndaý jáne bekitý;
– 2026 jyly DDU sáýir sammıtine Aral boıynsha Qarar shyǵarý.
Aral teńizi problemasy HH ǵasyrdaǵy eń iri ekologııalyq daǵdarystardyń biri retinde tanyldy, onyń saldaryn Aral mańyndaǵy turǵyndar sezinip otyr. Ondaǵan jyldar boıy óńir shóleıttenýge, topyraqtyń degradatsııasyna, ýly shańnyń taralýyna jáne halyqtyń densaýlyǵyna tikeleı áser etetin basqa da qıyndyqtarǵa tap boldy.
Sonymen qatar keıingi jyldary jaǵdaıdy turaqtandyrý boıynsha mańyzdy qadamdar jasaldy. Birlesken kúsh-jigerdiń arqasynda teńizdiń soltústik bóliginiń kebýin toqtatýǵa múmkindik týdy, keýip qalǵan aýmaqtardy aýqymdy kógaldandyrý júrgizilýde, sondaı-aq apattyń teris áserin azaıtý jónindegi jobalar iske asyrylyp jatyr.
Memlekettik organdar men halyqaralyq áriptesterdiń úılesimdi jumysynyń arqasynda búginde oń dınamıka baıqalady. Memleket basshysynyń qoldaýy jáne óńir ákiminiń jeke qatysýy ondaǵan jyldar boıy jınaqtalǵan problemalardyń sheshimin tabatynyna senimdilikti nyǵaıtady.
Buǵan deıin Soltústik Araldyń kólemin ulǵaıtý boıynsha belgilengen kórsetkishter merziminen buryn oryndalyp jatqanyn jazǵan bolatynbyz.