Qyzylordada dárigerler jańa týǵan nárestege kúrdeli ota jasady

QYZYLORDA. KAZINFORM – Qyzylorda oblystyq perınataldyq ortalyǵynda hırýrgııalyq kúrdeli ota jasaldy. Ota sátti ótip, náreste anasymen birge úıine shyǵaryldy. 

Atalǵan ortalyqtyń neonataldy hırýrgııa bóliminde «Іshektiń ornalasýy men fıksatsııalanýynyń buzylýy (Ledda sındromy)» dıagnozymen dúnıege kelgen nárestege kúrdeli hırýrgııalyq operatsııa jasaldy. Dárigerler brıgadasy quramynda neonataldy hırýrg Bolat Mahanbetııarov, kómekshi hırýrg Serik Núsipqojaev, balalar anestezıology Igor Samsonov, neonatolog – Mereke Altynbekova jáne ota jasaý meıirgeri Sáýle Japanova boldy. 

Bilikti mamandardyń eńbeginiń arqasynda balanyń densaýlyǵy qalpyna kelip, tolyq em alýyna múmkindik berildi.

«Týa bolǵan jedel ishek ótkizbeýshiligi (malrotatsııa) – ishektiń qalypty aınalýy men bekiný protsesiniń buzylýyna baılanysty týyndaıtyn patologııalyq jaǵdaı. Bul týa bitken aqaý ishektiń durys ornalaspaýy jáne ishek ilmekteriniń durys emes baǵytta aınalýymen sıpattalady. Malrotatsııa kezinde ishek aınalasynda qan tamyrlarynyń qysylýy nemese buralýy ishekke qan aınalymynyń buzylýyna jáne onyń ótkizgishtiginiń buzylýyna ákelýi múmkin. Bul jaǵdaıdy der kezinde emdeý qajet, sebebi ol ishek nekrozyna nemese perıtonıtke ákelýi múmkin», - deıdi dárigerler.

Eske salsaq, budan buryn Qyzylordada búırek transplantatsııasyna baılanysty kúrdeli ota jasaldy.