Qyzylordada «Damubala» baǵdarlamasyn alaıaqtyq maqsatta paıdalanǵandar sottaldy
QYZYLORDA. KAZINFORM — Qyzylorda qalasynyń № 2 soty Qylmystyq kodekstiń alaıaqtyq, qylmystyq jolmen alynǵan aqsha jáne ózge múlikti zańdastyrý baptarymen qos aıyptalýshynyń qylmystyq isin qarady.
Sottalýshylardyń biri oblystyq basqarmalardyń buıryǵyna sáıkes shyǵarmashylyq jáne sport úıirmelerine monıtorıng júrgizý tobynyń quramyna engen.
— Monıtorıng barysynda «Damubala» platformasymen jumys isteıtin ónim berýshiler arasynda jarııa etý oferta sharty boıynsha jeke kásipkerlerdiń ónim berý barysyn teksergen. Tekserý nátıjesinde kemshilikter baryn anyqtaǵan. Alaıda jeke kásipker ekinshi sottalýshynyń járdemdesýimen qyzmet babyn paıdalana otyryp, jábirlenshilerdiń 88 290 myń teńgesin ıemdengen. Sottalýshylardyń kinási sot fonografııalyq saraptama, qarap tekserý, sottalýshylardyń úıin jáne avtokóligin tintý, esepshotyndaǵy aqsha qozǵalysynyń úzindisin tekserý nátıjesinde, jábirlenýshiler men kýágerlerdiń jaýaby, basqa da is qujattary arqyly dáleldendi, — delingen oblystyq sot baspasóz qyzmetiniń habarlamasynda.
Sottalýshylardyń biri Qylmystyq kodekstiń 190-baby 4-bóliginiń 2-tarmaǵymen jáne 218-babynyń 1-bóligimen kináli dep tanylyp, 58-baby 3-bóliginiń talabymen onyń túpkilikti kommertsııalyq uıymdarda materıaldyq jaýapty jáne basshylyq laýazym atqarýǵa baılanysty qyzmetpen aınalysý quqyǵyn 10 jylǵa deıingi merzimge shektep, 6 jylǵa bas bostandyǵynan aıyrý jazasyn taǵaıyndady. Kodekstiń 53-babyna sáıkes jazasyn jeńildetetin mán-jaılar retinde jas balalarynyń bolýy eskerildi.
Ekinshisi de Qylmystyq kodekstiń 28-babynyń 5-bóligi, 190-babynyń 4-bóliginiń 2-tarmaǵymen 10 jylǵa kommertsııalyq uıymdarda materıaldyq jaýapty jáne basshylyq laýazym atqarý quqyǵynan, 5 jylǵa bas bostandyǵynan aıyryldy. Kodekstiń 63-babyna sáıkes taǵaıyndalǵan jaza shartty sanalyp, taǵaıyndalǵan merzimine probatsııalyq baqylaý belgilendi. Onyń da jas balalarynyń bolýy, shyn nıetpen ókinýi, qylmystyq quqyqbuzýshylyqty ashýǵa, basqa da sybaılas qatysýshylaryn áshkereleýge jáne qylmys nátıjesinde alynǵan múlikti izdestirýge belsendi túrde yqpal etýi jazasyn jeńildetýge kómektesti.
Úkim zańdy kúshine enbegen.
Jýyrda ǵana Qyzylorda qalasynyń № 2 soty Ulytaý oblysy Sátbaev qalasynyń burynǵy prokýroryna qatysty sot protsesin aıaqtady.