Qyzylordada «Damý bala» platformasy arqyly 88 mln teńge jymqyrǵandar sottaldy

ASTANA. KAZINFORM – Qyzylorda qalasynda balalar sportyn jáne shyǵarmashylyǵyn qoldaýǵa arnalǵan «Damý bala» platformasy arqyly qyzmet kórsetetin kásipkerlerden 88 mln teńgeden astam qarajatty jymqyrý faktisi boıynsha sot úkimi shyǵaryldy, dep habarlaıdy Qarjylyq monıtorıng agenttigi.

Agenttiktiń Qyzylorda oblysy boıynsha departamenti júrgizgen tergeý barysynda, monıtorıngtik top quramynda bolǵan qatysýshylardyń biri óziniń qyzmet babyn paıdalanyp, sybaılasymen birge kásipkerlerden tekseris nátıjelerin «oń sheship beremiz» degen jeleýmen aqsha bopsalaǵany anyqtaldy.

- Nátıjesinde olar 88 mln teńgeden astam qarajat alǵan. Aqshanyń bir bóligine kottedj jáne avtokólik satyp alynǵan. Sottyń sanktsııasymen bul múlikke tyıym salyndy, - delingen aqparatta.

Sot úkimimen basty aıyptalýshy kináli dep tanylyp, 6 jylǵa bas bostandyǵynan aıyrý jáne múlkin tárkileý jazasy taǵaıyndaldy. Onyń sybaılasy 5 jylǵa shartty túrde bas bostandyǵynan aıyryldy.

Úkim zańdy kúshine engen joq.

Aıta keteıik, Qyzylordada 100-den astam kásipker memlekettik grant qarjysyn maqsatsyz paıdalanǵan.