Qyzylordada bıýdjetke jáne uıymdarǵa 116,3 mln teńge qaıtaryldy
QYZYLORDA. KAZINFORM — Bıyl 9 aıda Qyzylorda oblysynda 53 aýdıtorlyq is-shara júrgizilse, sonyń 88,7 paıyzynda qarjylyq baǵyttaǵy zań talaby buzylǵany anyqtaldy.
Qyzylorda oblysy boıynsha ishki memlekettik aýdıt departamentiniń málimetinshe, 52 nusqama boıynsha bilim, qurylys, densaýlyq saqtaý jáne taǵy basqa salalardyń jaýapty ókilderi tártiptik jaýapkershilikke tartyldy. Al ákimshilik quqyq buzǵan aýdıt obektileriniń 112 laýazymdy ókiline ákimshilik hattama toltyryldy.
— Bilim berý, densaýlyq saqtaý, mádenıet jáne sport uıymdarynda 127,1 mln teńgeniń táýekeli rastaldy. Nátıjesinde bıýdjetke jáne uıymdarǵa 116,3 mln teńge qaıtarylyp, bıýdjet qarajatynyń negizsiz paıdalanylýyna jol berilgen joq, - dedi departament basshysy Erbol Kúzembaev.
Memlekettik satyp alý baǵytyndaǵy kameraldyq baqylaý nátıjesinde konkýrstyq qujattamada áleýetti ónim berýshilerge artyq talaptar belgileý, memlekettik jáne halyqaralyq standarttardy tehnıkalyq erekshelikte kórsetpeý, lottarǵa bólmeý boıynsha barlyǵy 34 mlrd 784 mln teńgege habarlama joldanyp, zańbuzýshylyqqa tosqaýyl qoıyldy.
Buǵan deıin Qyzylordada 427 mln teńgeniń medıtsınalyq uıymdarǵa negizsiz aýdarylǵany belgili bolǵan.