Qyzylordada bıýdjet qarajatyn zańsyz ıemdengen memlekettik qyzmetshi sottaldy

QYZYLORDA. KAZINFORM - Qyzylordada bıýdjet qarajatyn zańsyz ıemdengen áıel sottaldy.

Bul qylmystyq is Qyzylorda qalasynyń №2 sotynda qaraldy.

Qylmystyq is jeti epızodtan turady. Sottalýshy memlekettik fýnktsııalardy oryndaýǵa ýákilettik berilgen adam ekenine qaramastan óziniń qyzmet babyn paıdalanǵan. Ózine senip tapsyrylǵan bóten múlikti asa iri mólsherde jymqyrǵan.

- Sottalýshy zeınetaqy men áleýmettik tólemderdi taǵaıyndaý bóliminiń bas mamany qyzmetin atqarǵan. Qyzmet babyn paıdalanyp, óziniń shotyna 2018-2024 jyldar aralyǵynda bıýdjet qarajatyn zańsyz aýdarǵan. Ony jeke bas paıdasyna jaratyp, memleketke iri mólsherde zalal keltirgen. Sottalýshynyń qylmystyq áreketinen memleketke jalpy 24,7 mıllıon teńgedan astam múliktik zalal kelgen. Sot otyrysynda sottalýshy ózine taǵylǵan aıypty moıyndady. Óz áreketine ókinetinin kórsetti. Asyraýynda kámeletke tolmaǵan balalary baryn eskerip, bas bostandyǵynan aıyrýǵa baılanysty emes jaza taǵaıyndaýdy surady, - dep málim etti Qyzylorda qalasynyń №2 sotynan. 

Jábirlenýshi ókili sottalýshy shyǵyndy tolyq ótegenin jáne basqa talaby joq ekenin kórsetti. 

- Sot úkimen sottalýshy QR Qylmystyq kodeksiniń 189-baby 4-bóligi 2)-tarmaǵymen kináli dep tanyldy. Onyń múlki tárkilenbeıdi. Belgili bir laýazymdy atqarý quqyǵynan ómir boıyna aıyryldy. Oǵan 6 jyl merzimge bas bostandyǵynan aıyrý jazasy taǵaıyndaldy. QR Qylmystyq kodeksiniń 74-babynyń 1-bóligi qoldanylyp, on tórt jasqa tolmaǵan balasy bar áıel retinde jazasyn oryndaý bes jylǵa deıin keıinge shegerildi. Probatsııalyq baqylaý belgilendi, - dep tolyqtyrdy sottan.

Eske salsaq, budan buryn Jambyl oblysynda 2,5 aı buryn joǵalǵan jigit Qyzylordadan tabyldy.