Qyzylordada buralqy ıtter kóbeıdi degen shaǵymǵa veterınarııa basqarmasy jaýap berdi
QYZYLORDA. KAZINFORM — Qyzylorda qalasynyń ortalyq kóshelerinde qańǵybas ıtter kóbeıip ketkeni týraly áleýmettik jelilerde shaǵymdar jarııalandy.
Sonyń biri Instagram áleýmettik jelisindegi Krıtıka Qyzylorda paraqshasynda jarııalanǵan kórinedi.
— Ýnıversam aımaǵynda buralqy ıtter kóbeıip ketti. Abaı kóshesindegi 41-úıdiń, gúlder dúkeniniń aldynda kúnde top bolyp júredi. Ótip bara jatqan adamdarǵa qorqynyshty, ásirese, balalarǵa qaýipti. Máselege jaýapty mekemeler nazar aýdarsa eken, — delingen jazbada.
Osy mazmundaǵy aryz-shaǵymǵa Qyzylorda oblystyq veterınarııa basqarmasy jaýap berdi. Basqarma basshysy Shahmardan Qoıshybaevtyń aıtýynsha, kóshede ıtterdiń kóp júrýi kóbine olardyń uıyǵý kezeńimen baılanysty.
— Mundaı jaǵdaıǵa tap bolsańyz, 109 nómirine nemese qalalyq veterınarııa stantsııasyna habarlasýǵa bolady. Degenmen, «Qyzylorda qalasynda ıt qaptap ketti» degen pikirmen kelispeımin. Itter uıyǵý kezeńinde, ıaǵnı kóktem men kúz aılarynda kóshede kóbirek júredi. Biraq olardyń barlyǵynyń ıesi bar. Jańa zań boıynsha janýarlardy ustaý talaptary kúsheıtildi. Eger ıt qorada ustalmasa nemese basqa adamdarǵa qaýip tóndirse, onyń ıesine aıyppul salynady, — dedi Shahmardan Qoıshybaev.
Onyń aıtýynsha, qazir jergilikti ákimdikterge ıt aýlaý uıymyn qurý tapsyrylǵan. Bul jumysty jeke uıymdarǵa berý nemese arnaıy mekeme qurý máselesi ázirge qarastyrylyp jatyr.
Aıta keteıik, Qazaqstanda ıesiz janýarlar máselesi sońǵy jyldary qoǵamdy alańdatqan ózekti taqyryptyń birine aınaldy.
