Qyzylordada bý-gaz qondyrǵysyn salmaq bolǵan túrik ınvestory kedergige tap boldy

Prokýrorlar ınvestorlarǵa kómektesip jatyr. Qazir prokýrorlardyń nazarynda 1 myńnan astam ınvestıtsııalyq joba bar, dep habarlaıdy Kazinform.

Óńirlerde ınvestorlardyń quqyǵynyń buzylýyna jedel den qoıý jáne ákimshilik kedergilerdi alyp tastaý jumysy front-ofıster («bir tereze» qaǵıdaty boıynsha) jáne mobıldi toptar (sall-ortalyq 24/7 rejıminde) arqyly qamtamasyz etilip jatyr. 

Bas prokýratýra alańynda ınvestorlardyń quqyǵy men zańdy múddesin qorǵaıtyn arnaıy vedomstvoaralyq komıssııa quryldy.

Osy jumys sheńberinde ınvestorlar jáne ýákiletti organdar turaqty kezdesýler ótkizip júr. 

Mysaly, Bas prokýratýra qyzmetkerleri «Kazakh Invest» UK» AQ alańynda 391 mln AQSh dollary somasyna bý-gaz qondyrǵysyn salý boıynsha «Aksa Energy Qyzylorda» JShS túrik ınvestorymen kezdesý ótkizdi.

Jobany iske asyrý úshin qajetti jer ýchaskesiniń aýmaǵy (8,5 ga) ınvestorǵa naqty berilgennen (3,6 ga) áldeqaıda kóp ekeni anyqtaldy.

Osyǵan baılanysty oǵan qaıtadan jumys jobasyn ázirleý jáne memlekettik saraptamadan ótý qajet, bul qurylystyń bastalý merzimin keshiktirýi múmkin.

Joba Bas prokýratýranyń qadaǵalaýyna alyndy.

Qyzylorda oblysy prokýratýrasyna ınvestorǵa jańa jer ýchaskesin berý máselesin baqylaýǵa alý tapsyryldy.

Bul keıs Premer-Mınıstrdiń birinshi orynbasary R.V. Sklıardyń tóraǵalyǵymen ótken ınvestıtsııalyq shtab otyrysynda qaraldy.

Onyń nátıjesi boıynsha energetıka, ónerkásip jáne qurylys mınıstrlerine ınvestordyń problemasyn sheshý jóninde naqty tapsyrma berildi.

Jalpy búginde prokýrorlar ınvestorlardyń 77 problemalyq keısin sheshti.