Qyzylordada brýtsellez juqtyrǵan 70-ten astam mal soıyldy

QYZYLORDA. KAZINFORM – Ótken jyly Qyzylorda oblysynda malǵa tán asa qaýipti 13 túrli juqpaly aýrýǵa qarsy 5979,7 myń doza preparat alyndy.

Oblystyq veterınarııa basqarmasynyń baspasóz qyzmeti habarlaǵandaı, bıyl preparattar dozasynyń sanyn 6244,7 myńǵa jetkizý kózdelip otyr.

— 6 túrli enzootııalyq, ıaǵnı juqpaly emes aýrýdyń aldyn alýǵa oblystyq bıýdjetten 315,3 mln teńge bólindi. Oǵan 799,4 myń doza preparat satyp alynyp, egý jumystary tolyq júrgizildi. Brýtsellez aýrýy boıynsha 586,5 myń bas múıizdi iri qara, 1067,7 myń bas ýaq maldyń qan synamasy zertteldi. Nátıjesinde 42 bas sıyrdyń, 32 qoı-eshkiniń aýrý juqtyrǵany anyqtaldy. Olar talapqa sáıkes ýaqytyly soıyldy, — delingen habarlamada.

Basqarma oblysta asa qaýipti aýrýlar tirkelmegenin, epızootııalyq jaǵdaı turaqty ekenin málimdedi.
Aıta keteıik, búgingi kúni óńirde 1334 myń bas mal bar. Onyń basym bóligi — múıizdi iri qara men ýaq mal.

Buǵan deıin «Jalaǵash aýdanynda belgisiz indetten mal jappaı qyrylyp jatyr» degen aqparat tarap, oǵan atalǵan basqarma basshysy jaýap berdi.