Qyzylordada brýtsellez aýrýynyń 21 jaǵdaıy anyqtaldy
QYZYLORDA. KAZINFORM — Bıyl 6 aıda Qyzylorda oblysynda brýtsellez aýrýynyń 21 jaǵdaıy tirkeldi.
Oblystyq sanıtarııalyq-epıdemıologııalyq baqylaý departamentiniń málimetinshe, onyń 12-si Qyzylorda qalasynda, 3-i Qazaly, 3-i Qarmaqshy, 2-i Jańaqorǵan, 1-i Aral aýdandarynda tirkeldi.
— Naýqastardyń 42,9%-y — aýyldyq eldi meken turǵyndary. Barlyq naýqas brýtsellez aýrýynan qolaıly eldi mekenderde tirkelgen. Aýrý kózimen qarym-qatynasta bolǵan 73 adam esepke alynyp, laboratorııalyq jolmen zertteldi, nátıjesi teris bolyp shyqty. Aýrý oshaqtarynda qorshaǵan ortadan 73 synama alynyp, 8-inen nemese 22,9%-ynan oń nátıje anyqtaldy. Bul boıynsha veterınarııa salasyna habarlama berilip, oshaqqa dezınfektsııa jumysy júrgizildi, — dedi departament basshysy Gúlmıra Syzdyqova.
Brýtsellez — adamdar men mal arasynda kezdesetin juqpaly aýrý. Bul aýrýǵa barlyq úı janýary shaldyǵady. Adamǵa kóp jaǵdaıda qoı men eshkiden juǵady.
— Maldyń et-sút ónimderin shıki nemese termııalyq óńdeýden ótkizbeı paıdalaný, aýrý maldy rezeńke qolǵapsyz soıý, qyrqý jáne terisin óńdeý qaýip týǵyzady. Osy oraıda aýrý maldy tóldetý, qoıdyń júnin qyrqyp, odan ónim alý kezinde arnaıy jumys kıimin, rezeńke qolǵapty paıdalaný qajettigin, sút jáne sút ónimderin, et jáne et ónimderin qoldanar aldynda termııalyq óńdeýden mindetti túrde ótkizý qajettigin eske salamyz. Der kezinde dárigerge qaralmaǵan jaǵdaıda aýrý asqynyp, múgedektikke ákelip soqtyrýy yqtımal, — dep eskertti basqarma basshysy.
Al Atyraý oblysynda bıylǵy alǵashqy 6 aıda brýtsellezge qarsy júrgizilgen zertteý barysynda 335 bas maldan aýrý anyqtaldy.
