Qyzylordada birneshe shaǵyn aýdanda jaryq sóndi
QYZYLORDA. KAZINFORM – Qyzylorda qalasynyń turǵyndary jaryqsyz qalǵanyna shaǵym bildirdi.
Qyzylorda elektr taratý toraptary kompanııasy munyń sebebin «KEGOK» AQ avtomatıka jelisinde tirkelgen apattyq aqaýmen baılanystyryp otyr.
- Aqaýǵa baılanysty 35/10 kV áýe jelisinde elektr energııasy ajyratyldy. Osyǵan baılanysty qazirgi ýaqytta qalanyń Ortalyq alań, Saıahat, SPMK-70, Araı, Temirjol vokzaly, KBI, Tasbóget, Sabalaq, Naýryz jáne Kommýnızm shaǵyn aýdandarynda jaryq ýaqytsha óshirildi. Qazirgi tańda «KEGOK» AQ jáne «QETTK» AQ mamandary birlesip, aqaýdy jedel joıý jumystaryn júrgizip jatyr. Apattyq brıgadalar kúsheıtilgen rejımdegi jumysqa kiristi, - delingen habarlamada.
Mamandar elektr energııasyn múmkindiginshe qysqa merzimde qalpyna keltirý úshin qajetti sharalar qabyldanǵanyn málimdedi.
Budan buryn qolaısyz aýa raıynyń kesirinen birneshe saǵat boıy jaryqsyz qalǵan Qyzylorda qalasynyń birneshe aýmaǵynda jaǵdaı rettelgen edi.
