Qyzylordada bir kúnde eki kólik urlaǵan kúdikti ustaldy

QYZYLORDA. KAZINFORM — Qyzylordalyq polıtseıler bir kúnde eki kólikti urlap ketken kúdiktini qolǵa túsirdi. Qaskóıdiń Syrdarııa aýdanynyń turǵyny ekeni anyqtaldy.

Oblystyq polıtsııa departamentiniń baspasóz qyzmeti taratqan málimetke súıensek, Qyzylorda qalasynyń 30 jastaǵy turǵyny dúken janynda kóligin otaldyrǵan kúıi qaldyryp, az ýaqytqa syrtqa shyǵyp ketken. Qaskóı osy sátti tıimdi paıdalanǵan. Iesi qaıtyp oralǵanda kóliginiń joq ekenin baıqap, birden polıtsııaǵa júgingen.

— Polıtsııa jedel áreket etti. Urlyq týraly barlyq patrýldik ekıpajǵa habar berilip, beınebaqylaý kameralary arqyly kóliktiń qala syrtyna baǵyt alǵany anyqtaldy. Syrdarııa aýdandyq polıtsııa bóliminiń qyzmetkerleri kólikti tas jolda toqtatyp, 22 jastaǵy aýdan turǵynyn ustady. Tergeý barysynda onyń sol kúni taǵy bir avtokólikti urlaǵany belgili boldy. Kúdikti qamaýǵa alyndy, — delingen habarlamada.

Atalǵan fakt boıynsha qylmystyq is qozǵaldy. Sotqa deıingi tergeý amaldary júrgizilip jatyr.

— Kólikti otaldyrǵan kúıde qaraýsyz qaldyrmańyzdar. Bul quqyq buzýshylar úshin yńǵaıly sátke aınalýy múmkin, — dep eskertti polıtsııa.

Qyzylorda oblystyq polıtsııa departamenti 8 qańtarǵa qaraǵan túni Qyzylorda qalasynda pyshaq jaraqaty saldarynan qala turǵyny jáne onyń 34 jastaǵy qyzy kóz jumǵanyn habarlaǵan edi.