Qyzylordada bir kóshede zańsyz salynǵan 7 jazǵy kafe buzyldy
QYZYLORDA. KAZINFORM – Jyl basynan beri jeke jáne zańdy tulǵalardyń joldanymy negizinde Qyzylorda oblysynyń qurylys salasynda jospardan tys 82 tekserý júrgizildi.
Oblystyq memlekettik sáýlet-qurylys baqylaýy basqarmasynyń málimetinshe, onyń 62-si boıynsha aıyppul salynyp, anyqtalǵan aqaýlar men kemshilikterdi joıý jóninde nusqama berildi.
- 270 ákimshilik is qozǵalyp, onyń 219-y basqarma tarapynan qaraldy. 65 mln 185 myń teńgege jýyq aıyppul salý jóninde ákimshilik shara qoldanyldy. Bul ótken jylǵa qaraǵanda 6,5 mln teńge shamasynda artyq. Aıyppuldyń 48,5 mln teńgege jýyǵy bıýdjetke óndirildi, - dedi basqarma basshysy Ǵanıjan Qalıev.
2023-2025 jyldar aralyǵynda oblystyq prokýratýra sáýlet, qala qurylysy jáne qurylys qyzmeti salasyndaǵy memlekettik lıtsenzııa boıynsha zańnama talaptarynyń saqtalýyn teksergen bolatyn. Nátıjesinde 48 ákimshilik is qozǵalsa, 11 mln 266 myń teńgeden astam aıyppul salynyp, ol tolyǵymen memleket paıdasyna óndirildi.
- Turǵyndardyń ótinishi negizinde Qyzylorda qalasynyń Jeltoqsan kóshesindegi kópqabatty turǵyn úılerge japsarlas salynǵan 7 jazǵy kafeniń qurylysyna baqylaý júrgizdik. Nátıjesinde zańnama talaptaryna qaıshy salynǵan nysandar anyqtalyp, menshik ıelerine olardy bastapqy qalpyna keltirý týraly nusqama berildi. Qabyldanǵan shara nátıjesinde zańsyz salynǵan jazǵy kafelerdiń qurylysy tolyq buzylyp, aýmaǵy burynǵy qalpyna tústi, - dedi basqarma basshysy.
Al buǵan deıin Almatyda qala qurylysyn baqylaý basqarmasynyń ókilderi Rozybakıev kóshesi, 249/1 mekenjaıyndaǵy qosalqy salynǵan nysandy buzý jumystarynyń bastalǵanyn aıtty.
