Qyzylordada botanıkalyq baq paıdalanýǵa berildi
QYZYLORDA. KAZINFORM — Búgin Halyqaralyq balalardy qorǵaý kúninde oblys ákimi Murat Ergeshbaev, QR Parlamenti Senaty men Májilisiniń depýtattary Rýslan Rústemov, Marhabat Jaıymbetov, zııaly qaýym ókilderi men el aǵalary Memleket basshysynyń qoldaýymen salynǵan Botanıkalyq baqtyń ashylý rásimine qatysty.
Mereke kúni jetkinshekterge tartý etilgen Botanıkalyq baq Prezıdent saıabaǵy aýmaǵynda ornalasqan. Bas merdiger — «Alem Qurylys AQ» JShS. Qurylysyna 4,9 mlrd teńge bólingen, nysannyń irgetasy byltyr qyrkúıek aıynda sol kezdegi aımaq basshysy Nurlybek Nálibaevtyń bastamasymen qalanǵan bolatyn.
Ashylý rásiminde oblys ákimi Murat Nálqojauly balalardy merekemen quttyqtap, Botanıkalyq baq jumysy jetkinshekterdiń tıimdi demalysyn uıymdastyrýǵa jáne tyń jobalardy júzege asyrýǵa baǵyttalǵanyn atap ótti.
— Barshańyzdy 1 maýsym — Halyqaralyq balalardy qorǵaý kúni merekesimen shyn júrekten quttyqtaımyn! Bala — bizdiń basty baılyǵymyz. Bilimdi, deni saý, ultjandy urpaq tárbıeleý — barshamyzdyń ortaq paryzymyz.
Prezıdentimiz Qasym-Jomart Kemeluly: «Ul-qyzdarymyzdyń parasatty, jan-jaqty bolyp ósýine jaǵdaı jasaý, jas azamattarymyzdyń quqyǵyn qorǵap, densaýlyǵyn saqtaý — memleketimizdiń basty mindeti», degen bolatyn.
Búgin Prezıdent saıabaǵynyń aýmaǵynan ashylǵan Botanıkalyq baq — osy aýqymdy bastamanyń aımaǵymyzdaǵy naqty ári jemisti kórinisi. Baq ishine Qytaı, Ońtústik Afrıka, Japonııa, Ońtústik jáne Ortalyq Amerıkada ósetin jasyl jelek egildi. Osy arqyly jas jetkinshekterge ósimdikterdiń ekojúıedegi mańyzy túsindiriledi. Bul jaı ǵana balalar serýendeıtin saıabaq emes, tabıǵat pen ǵylymdy ushtastyratyn, ekologııalyq mádenıetti qalyptastyratyn kópfýnktsıonaldy keshen bolmaq. Balalarymyz osy jerde tabıǵatpen tildesip, eko-jaýapkershiliktiń, eńbekqorlyqtyń shynaıy úlgisin kóredi. Osy baqtan bizdiń aımaqtyń ǵana emes, búkil elimizdiń ekologııasyn zertteıtin bolashaq ǵalymdar, bıologtar men agronomdar shyǵady dep senemiz, — dedi Murat Nálqojauly.
Rásimde Rýslan Rústemov, Marhabat Jaıymbetov quttyqtaý sóz sóıledi. Bilim berý salasynyń damýyna eleýli úles qosqan ustazdar men jańa nysan qurylysyn merziminde aıaqtaǵan merdiger mekeme qyzmetkerleri oblys ákiminiń Alǵys hatymen marapattaldy.
Botanıkalyq baq — ekologııalyq tanymdy, týrızmdi damytýǵa jáne jańa qoǵamdyq keńistikter qurýǵa baǵyttalǵan zamanaýı kópfýnktsıonaldy keshen. Jalpy aýdany 1500 sharshy metr bolatyn eki jylyjaıǵa Afrıka, Ońtústik Amerıka, Avstralııa, Japonııa, Qytaı jáne Madagaskar sııaqty álemniń ár aımaǵynan 92 túrli 3300-den astam ósimdik egilgen. Veerli palma, Kanar qurmasy, kaktýs pen aloe, vashıngtonııa palmasy, strelıtsııa, jakaranda, alyp ıýkka, maqta aǵashy, bambýk, sándik ósimdikter, karıota jaıqalyp tur. Bul ósimdikter gúldegende hosh ıisi ańqyp, qyzǵylt sary, kógildir, kúlgin sııaqty alýan túske boıalady.
Ósimdikterge qolaıly jaǵdaı jasaý úshin mıkroklımatty avtomatty basqarý, sýarý jáne sý daıyndaýdyń zamanaýı ınjenerlik júıelerimen jabdyqtalǵan.
Botanıkalyq baq ósimdikterdiń biregeı túrleri ósetin oryn ǵana emes, ekologııalyq mádenıettiń, bilim berýdiń jáne ishki týrızmniń damýyna qyzmet etetin, aımaq turǵyndary men qonaqtary jıi bas qosatyn mekenge aınalady.
Munda stýdentter, mektep oqýshylarynyń, tabıǵat janashyrlarynyń tanymyn keńeıtýge barlyq jaǵdaı jasalǵan. Botanıkalyq baqtyń erekshe atmosferasy kelýshilerge jaılylyq syılaıdy.
Aıta keteıik, Memleket basshysynyń qoldaýymen Syr óńirinde keıingi tórt jylda 46 zamanaýı bilim berý nysany tabystaldy.
«Keleshek mektepteri» ulttyq jobasy aıasynda 10 jańa mektep salyndy. Fızıka-matematıka baǵytyndaǵy «Bilim-ınnovatsııa» lıtseı-ınternaty, mýzykalyq kolledjdiń jańa oqý ǵımaraty men jataqhanasy paıdalanýǵa berildi. «Oqýshylar saraıy», «Syr juldyzdary» akademııasy, Jalaǵash, Jańaqorǵan, Shıeli aýdandaryndaǵy «Oqýshylar úıi» men «Óner mektepteri» jas jetkinshekterdiń shyǵarmashylyq, zııatkerlik áleýetin arttyrýǵa qyzmet etýde. Jaqynda ǵana jyl boıy úzdiksiz qyzmet kórsetetin «AI-KERIM» oqý-saýyqtyrý ortalyǵy balalar ıgiligine aınaldy.
