Qyzylordada bortynda 3 adam bar AN-2 ushaǵy 8 saǵattan keıin tabyldy
QYZYLORDA. KAZINFORM — Keshe Tótenshe jaǵdaılar mınıstrliginiń kezekshi bólimine Qyzylorda oblysynda AN-2 ushaǵynyń májbúrli túrde qonǵany týraly habarlama kelip tústi.
Qyzylorda oblystyq Tótenshe jaǵdaılar departamentiniń málimetinshe, Tań-Qumkól baǵytynda ushqan ushaqtyń bortynda 3 adam bar eken.
- Olardyń qaıda ekeni belgisiz edi. Baılanys ornatý múmkin bolmady. Jedel izdestirýge Tótenshe jaǵdaılar jáne Polıtsııa departamentteriniń kúsh-quraldary tartyldy. Sonymen qatar TJM «Qazavıaqutqarý» AQ tikushaǵy jumyldyryldy, - delingen vedomstvo habarlamasynda.
Іzdestirý toby joǵalǵandardy 8 saǵattan keıin aıdaladan taýyp, Syrdarııa aýdanynyń Tereńózek kentine jetkizdi. Olar medıtsınalyq kómekti qajet etpegen.
Al jaqynda Qyzylorda oblysynda «QazAvıaQutqarý» AQ tikushaǵy arqyly naýqas sábı emdeý mekemesine jetkizildi.