Qyzylordada borandy kúni mal izdeýge shyqqan jasóspirim aman tabyldy

Qyzylordalyq polıtseıler borandy kúni mal izdeýge shyqqan 16 jastaǵy jasóspirimdi izdep tapty, dep habarlaıdy Kazinform.

Qyzylorda oblysynda 11 jeltoqsanda aýa raıy kúrt ózgerip, 25 gradýsqa deıin sýytty. Sol kúni kúndizgi saǵat 10:00 shamasynda 46 jastaǵy azamat 16 jastaǵy ulymen Jalaǵash aýdanyna qarasty Jańadarııa aýylynan 20 shaqyrym qashyqtyqta ornalasqan Aqshoqy ýchaskesinde fazendadan eki jaqqa bólinip, mal izdeýge shyqqan.

Saǵat 14:00 shamasynda ákesi fazendaǵa qaıta oralyp, balasynyń fazendaǵa áli kelmegenin biledi. Alǵashqyda avtokólikpen ulyn izdeýge ózi shyǵady. Áreketi sátsiz bolyp, ol polıtsııaǵa júginýge májbúr bolǵan.

Jasóspirimdi izdestirýge Jalaǵash aýdandyq polıtsııa bóliminiń jeke quramy dereý jumyldyryldy. Polıtseıler, Tótenshe jaǵdaı departamentiniń qyzmetkerleri, aýyl turǵyndary men eriktilerden arnaıy top quryldy. Aýdannyń barlyq aýyly, dalalyq joldar túgel qamtyldy. Іzdestirý sharalarynyń nátıjesinde joǵalǵan bala túngi saǵat 2:00-de Jalaǵash aýdany Jańadarııa aýylyna qarasty dalalyq jerden soltústikke qaraı 20 shaqyrym jerden tabyldy.

«Іzdestirý jumystary sátti aıaqtaldy. Jasóspirim qatty jeldiń áserinen jolynan adasqan. Aımaq turǵyndarynan daýyldy eskertý jarııalanǵan ýaqytta alys saparǵa shyqpaýyn suraımyz», - deıdi Qyzylorda oblystyq polıtsııa departamentiniń bastyǵy Mahsýdhan Ablazımov.

Eske salsaq, budan buryn Qyzylordada kópqabatty turǵyn úıden órt shyǵyp, eki adamdy kúıik shaldy.