Qyzylordada bilim bóliminiń basshysy laýazymynan bosatyldy
QYZYLORDA. KAZINFORM – Qyzylorda qalasy prokýratýrasynyń qadaǵalaý aktileri negizinde memlekettik qyzmetke kir keltiretin tártiptik teris qylyq jasaý faktilerimen laýazymdy tulǵalar jaýapqa tartyldy. Bul týraly Qyzylorda qalasynyń prokýratýrasy málimdedi.
«Qyzylorda qalasy bilim bóliminiń basshysy laýazymdyq ókilettikterin asyra paıdalaný arqyly 2022-2023jj. aralyǵynda 5 qyzmetkerdi konkýrssyz bilim berý uıymdaryna pedagog retinde jumysqa qabyldaý týraly zańsyz buıryq qabyldaǵan. Sonymen qatar Qyzylorda qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń orynbasarymen qala aýmaǵynda 40 jaıaý júrginshiler proektorlaryn ornatý boıynsha oryndalmaǵan jumystar qabyldanyp, 27 mln. qarajat negizsiz aýdarylǵan» - delingen habarlamada.
Qadaǵalaý aktilerin qaraý nátıjesinde bilim bóliminiń basshysy laýazymynan bosatylsa, bólim basshysynyń orynbasary «qyzmetke tolyq sáıkes emestigi týraly eskertý» túrindegi tártiptik jaýapqa tartyldy.
