Qyzylordada bıologııalyq tepe-teńdikti saqtaý úshin qasqyr aýlanyp jatyr

QYZYLORDA. KAZINFORM – Qyzylorda oblysynda qorshaǵan ortadaǵy bıologııalyq tepe-teńdikti saqtaý maqsatynda jyrtqysh ańdardyń sanyn retteý baǵytynda jumys júrgizilip keledi.

Oblystyq tabıǵı resýrstar jáne tabıǵat paıdalanýdy retteý basqarmasy ótken jyly 167 reıdik is-shara uıymdastyrdy.

— Nátıjesinde 47 qasqyr, 6 shıbóri aýlandy. Sonymen birge bıyl 13-22 qańtar aralyǵynda Jańaqorǵan orman jáne janýarlar dúnıesin qorǵaý mekemesiniń qyzmetkerleri Jańaqorǵan aýdanyndaǵy Qojakent, Mashbek, Qyrkeńse, Jańaaryq, Ózkent, Túgisken aýyldyq okrýgteriniń qum jaq betkeıinde jyrtqysh ańdar aýlady. Reıd barysynda 2 qasqyr, 90 shıbóri ustaldy, — delingen habarlamada. 

Aıta keteıik, Qazaqstan aýmaǵynda qasqyr men shıbóri sanyn retteýge qatysty jýyrda bıologııalyq negizdeme ázirlengeni belgili boldy.