Qyzylordada bıyl asqazanǵa alǵash ret ashyq ota jasaldy
QYZYLORDA. KAZINFORM — Qyzylorda oblysynda jas hırýrgterdiń kásibı biliktiligin arttyrý maqsatynda sheberlik saǵaty uıymdastyryldy. A.Syzǵanov atyndaǵy Ulttyq ǵylymı hırýrgııa ortalyǵynyń jetekshi mamandary sheberlik saǵaty aıasynda asqazannyń qaterli isigi dıagnozy qoıylǵan eki naýqasqa hırýrgııalyq ota jasady.
Birinshi ota ashyq ádispen asqazan rezektsııasy arqyly oryndaldy.
— Bul — asqazannyń qaterli isik ornalasqan bóligin hırýrgııalyq jolmen alyp tastaýǵa baǵyttalǵan kúrdeli operatsııa. Ota barysynda zaqymdalǵan tinderdi alyp tastap, aýrýdyń taralý erekshelikterin eskere otyryp, hırýrgııalyq emdeýdiń tıisti kezeńderi júzege asyrylady. Asqazannyń qaterli isigi kezinde mundaı operatsııanyń kólemi men tásili naýqastyń jaǵdaıyna, isiktiń ornalasýyna jáne aýrýdyń satysyna qaraı anyqtalady. Asqazanǵa ashyq ádispen jasalatyn mundaı ota bıyl óńirde alǵash ret oryndaldy. Bul oblystyq hırýrgııa salasynyń tájirıbesin keńeıtip, kúrdeli onkologııalyq aýrýlardy hırýrgııalyq jolmen emdeý múmkindikterin arttyrýdaǵy mańyzdy qadam boldy, — dep habarlady oblystyq densaýlyq saqtaý basqarmasy.
Ekinshi naýqasqa laparoskopııalyq ádispen asqazan rezektsııasy jasaldy. Bul — zamanaýı az ınvazıvti hırýrgııalyq tásilderdiń biri. Operatsııa kezinde qursaq qýysyna birneshe shaǵyn tilik arqyly arnaıy quraldar men beınekamera engizilip, hırýrgııalyq áreketter ekrandaǵy keskinniń kómegimen oryndaldy.
— Laparoskopııalyq ádistiń basty ereksheligi — operatsııalyq jaraqat kóleminiń az bolýy. Naýqastyń jaǵdaıy men medıtsınalyq kórsetilimderine baılanysty bul tásil operatsııadan keıingi aýyrsynýdy azaıtýǵa, qalpyna kelý kezeńin jeńildetýge jáne aýrýhanada jatý merzimin qysqartýǵa múmkindik beredi. Asqazannyń qaterli isigi kezinde laparoskopııalyq rezektsııany oryndaý hırýrgııalyq toptan joǵary kásibı sheberlikti, dáldikti jáne zamanaýı tehnologııalardy meńgerýdi talap etedi, — delingen habarlamada.
Sheberlik saǵaty oblystyq kópbeıindi oblystyq aýrýhananyń sımýlıatsııalyq ortalyǵynda tikeleı onlaın-translıatsııa arqyly kórsetildi. Oǵan aýdandardan kelgen hırýrg dárigerler qatysyp, kúrdeli otalardyń oryndalý barysyn baqylady.
Buǵan deıin biz Qazaqstanda jyl saıyn 1,5 myńǵa jýyq nárestege hırýrgııalyq operatsııa jasalatynyn jazdyq.
