Qyzylordada bıyl 413 úıge ystyq sý kelýge tıis, áli jartysynda joq

QYZYLORDA. KAZINFORM — Qyzylorda keshege deıin elimizdegi ortalyqtandyrylǵan ystyq sý júıesi joq jalǵyz oblys ortalyǵy bolyp keldi. Óńir halqy otyz jyldan bergi armanyna endi ǵana qol jetkizdi. Kazinform tilshisi máseleniń qalaı sheshilip jatqanyn zerttep kórdi.

Ótken ǵasyrdyń toqsanynshy jyldary ekonomıkamyz toqyrap, áleýmettik jaǵdaıymyz aqsaǵan eleń-alań shaqta aımaq basshylyǵy qolda bardy ustap qala almady.

Qarjy tapshylyǵynyń kesirinen kópqabatty úılerge ystyq sý berý toqtap, ınfraqurylymnyń toz-tozy shyqty. Máseleniń túıini Memleket basshysynyń tapsyrmasynan keıin tarqatyla bastady. 

Prezıdent tapsyrmasy eki kezeń boıynsha oryndalyp jatyr. Byltyr Úkimet rezervinen oǵan 11 mlrd teńge bólindi.

Oblystyq energetıka jáne turǵyn úı-kommýnaldyq sharýashylyq basqarmasy Qyzylorda qalasynda barlyǵy 835 kópqabatty turǵyn úı ortalyqtandyrylǵan jylý júıesine, onyń ishinde 413 kópqabatty turǵyn úı ortalyqtandyrylǵan ystyq sý júıesine qosylǵanyn málimdedi.

227 úıde ystyq sý júıesi qurylys jobasy boıynsha bastapqyda qarastyrylǵanyn, 186 úı ótken jyly ystyq sýmen qamtamasyz etilgen.

Alaıda bıyl kóktemde ǵana biz Qyzylordada ázirge tek 104 úıge ystyq sý kelgenin jazǵan edik. 

— Bıyl 237 kópqabatty turǵyn úıdi ystyq sýǵa qosý úshin Úkimet rezervinen 5 mlrd teńge, arnaýly memlekettik qordan 10,2 mlrd teńge qarjy bólindi. Qazirgi kúni qurylys-montaj jumystary júrgizilip jatyr. Jyl sońyna deıin kópqabatty turǵyn úıler ystyq sýǵa qosylady, — dedi basqarma basshysynyń orynbasary Tahır Nádirbek. 

Degenmen, osyǵan deıin naqty qansha úıde jospar oryndalǵany resmı jaýapta aıtylmady. 

Búgingi kúni qaladaǵy barlyq kópqabatty turǵyn úıdiń jertólelerinde avtomattandyrylǵan jylý pýnkteri men jylý energııasyn esepteýish quraldary ornatylǵan. 

— Bul qondyrǵylar syrtqy temperatýra negizinde jylý berýdi avtomatty túrde rettep, tutynýshylardy joǵary sapaly jylý jáne ystyq sýmen qamtamasyz etedi. Sonymen qatar jylý jelilerindegi júktemeni azaıtady. Dál esepteý arqyly elektr energııasyn únemdeı alamyz, — dedi Tahır Nádirbek.

Eskeretin nárse, úıine ystyq sý kirgizý-kirgizbeýdi árkim ózi sheshedi. Kirgizgen jaǵdaıda ornatý tegin. 

Aıta keteıik, Qyzylorda turǵyndary otyz jyl boıy ystyq sý máselesin «Arıston» jylytqysh quraly arqyly sheship keldi.