Qyzylordada bıyl 30 jyldan astam ýaqyttan keıin ystyq sý berilmek
QYZYLORDA. KAZINFORM — Qyzylorda qalasynda 30 jyldan astam ýaqyttan keıin kópqabatty úıdiń turǵyndaryna ystyq sý beriletin boldy.
Bul jóninde Kazinform agenttigi «Arıstondar qalasy: Qyzylorda qashan ystyq sýmen qamtamasyz etiledi» degen taqyrypta problemalyq materıal jarııalaǵan edi.
Memleket basshysynyń qoldaýymen aldaǵy eki jylda kópqabatty úılerge kezeń-kezeńimen ystyq sý beriledi.
Qazir oblys ortalyǵynda kópqabatty 781 turǵyn úı ortalyqtandyrylǵan jylý júıesine qosylǵan.
Onyń ishinde 174 úıdiń ystyq sýǵa qosýǵa múmkindigi bar. Olardyń 68-i ystyq sý qosýǵa daıyn tursa, 424-i qarjylandyrýdy qajet etedi.
Al 184 úıdi qosý múmkin emes.
Sebebi olardyń jertólesi, jylý elevatory joq. Keıbir turǵyn úıler apatty dep tanylǵan.
«Qarjylandyrýdy taalap etetin kópqabatty turǵyn úılerdi ystyq sý júıesine qosý úshin demeýshilik esebinen quny 26,2 mlrd teńgeni quraıtyn 32 joba ázirlendi. Bul jumystar eki kezeńmen júrgiziledi. Alǵashqy kezeńde 2024 jyly 187, ekinshi kezeńde 2025 jyly 237 turǵyn úı qamtylady. Bıylǵy jyly Úkimet rezervinen 11 mlrd teńge bólinip, 187 úı ortalyqtandyrylǵan ystyq sýmen qamtý úshin memlekettik satyp alý konkýrsy jarııalandy. Qazir jeńimpaz merdiger mekeme anyqtaldy. Tapsyrys berýshi men merdiger mekemeler arasynda kelisimshart jasalýda. Qurylys-montajdaý jumystarynyń merzimi — 4 aı. Qala ákimdigi tarapynan kópqabatty turǵyn úıdiń páterlerin ortalyqtandyrylǵan ystyq sýmen qamtamasyz etýge baǵyttalǵan qajetti sharalardy qabyldaıtyn jumysshy toby qurylyp, algorıtmi bekitildi», — dedi Qyzylorda qalasy ákiminiń mindetin atqarýshy Ǵalymjan Erkebaı.
