Qyzylordada betin tumshalaǵan 300-deı adamǵa eskertý berildi
QYZYLORDA. KAZINFORM – Qyzylorda oblysynda qoǵamdyq oryndarda adamnyń bet-álpetin tanýǵa kedergi keltiretin kıim úlgilerine qatysty zań talaptaryn túsindirý jumysy turaqty túrde júrgizilip keledi.
Ákimshilik quqyqbuzýshylyq týraly kodekstiń 434-babynyń 3-bóligine sáıkes qoǵamdyq oryndarda adamnyń júzin tanýǵa kedergi keltiretin kıim kııýge tyıym salynǵan. Oǵan balaklava, medıtsınalyq maqsattan tys betperde, nıkab pen adamnyń bet-júzin tolyq nemese ishinara jabatyn ózge de kıim túrleri kiredi.
- Jyl basynan beri oblysta atalǵan bap boıynsha 303 ákimshilik quqyq buzý deregi tirkeldi. Sonyń 301-ine eskertý berilse, 2-ine aıyppul salyndy. Іs-shara barysynda polıtsııa qyzmetkerleri turǵyndarmen kezdesip, zań talaptaryn túsindirip, aqparattyq jadynamalar taratty. Sonymen qatar azamattardyń suraqtaryna jaýap berip, qoǵamdyq oryndarda quqyqtyq saýattylyqty arttyrýǵa baǵyttalǵan jumys júrgizdi. Ásirese, saýda-oıyn-saýyq ortalyqtarynda, bilim berý uıymdarynda jáne adamdar kóp shoǵyrlanatyn oryndarda profılaktıkaǵa mán beriledi, - delingen oblystyq polıtsııa departamentiniń habarlamasynda.
Polıtseılerdiń aıtýynsha, mundaı is-sharalardyń negizgi maqsaty – azamattardy jaýapkershilikke tartý emes, quqyqbuzýshylyqtyń aldyn alý. Zań talaptaryn alǵash ret buzǵan azamattarǵa eskertý jasalady. Al quqyq buzýshylyq qaıtalanǵan jaǵdaıda zańnamaǵa sáıkes 10 aılyq eseptik kórsetkish mólsherinde ákimshilik aıyppul salynady.
Buǵan deıin Mańǵystaýda betin tumshalaǵan 50 shaqty adamǵa eskertý jasalǵan bolatyn.
