Qyzylordada bes aıda esirtkige qatysty 96 quqyq buzýshylyq anyqtaldy

QYZYLORDA. KAZINFORM - Qyzylorda oblysynda bıyl bes aıda esirtkige qatysty 96 quqyq buzýshylyq anyqtaldy. Ol byltyrǵy jyldyń uqsas kezeńimen salystyrǵanda 19 derekke az bolyp otyr.

Bul oqıǵalardyń 12-si esirtki ótkizý, 1-ýi esirtki jarnamalaý, 1-ýi esirtkini asa iri mólsherde saqtaý bolsa, 13-i esirtki ósirýge qatysty ekeni anyqtaldy.

«Zańsyz aınalymnan jalpy salmaǵy 22 keliden astam esirtki zaty alynsa, onyń ishinde 267,1 grammy - sıntetıkalyq esirtki zattary. Bıylǵy jyldyń sáýir aıynda úı aýlasyndaǵy jylyjaıda sora ósimdigin ósirip, marıhýana óndirgen qala turǵynynan fıto-zerthana anyqtaldy. Odan 214 túp sora ósimdigi men 5 keliden astam marıhýana jáne gashısh esirtki zattary zattaı dálel retinde alynǵan», - dep málim etti Qyzylorda oblystyq Polıtsııa departamentinen.

Sondaı-aq mamyr aıynda Qyzylordadan Astanaǵa marıhýana esirtki zatyn asa iri mólsherde tasymaldaýdyń 1 deregi anyqtaldy. Іshki baqylaýdaǵy jetkizilim ádisi boıynsha qylmysker Astana qalasynda qolǵa túsken.

Eske salsaq, budan buryn Qyzylordada esirtki satpaq bolǵan burynǵy muǵalim ustaldy.