Qyzylordada Berdibek Saparbaevtyń ómir jolyna arnalǵan kitap tanystyryldy
QYZYLORDA. KAZINFORM — Búgin Qyzylordada «Dostyq úıinde» kórnekti memleket jáne qoǵam qaıratkeri Berdibek Mashbekuly Saparbaevtyń ómiri men eńbek jolyna arnalǵan «Saparbaev tulǵasy» kitabynyń tanystyrylymy ótti.
Qyzylorda oblysy ákiminiń baspasóz qyzmeti habarlaǵandaı, oǵan oblys ákimi Murat Ergeshbaev, quqyq qorǵaý organdarynyń birinshi basshylary, máslıhat depýtattary, zııaly qaýym ókilderi, jas memlekettik qyzmetshiler, azamattyq qoǵam jáne buqaralyq aqparat quraldarynyń ókilderi, kitaptyń qurastyrýshysy Abaı Seıfýllauly, aǵaıyn-týys qatysty.
Aımaq basshysy Berdibek Saparbaevtyń el damýyna sińirgen eńbegine toqtalyp, onyń memlekettik qyzmettegi ónegeli joly jas urpaqqa úlgi ekenin atap ótti.
— Memleket basshysynyń tapsyrmasyna sáıkes júzege asyp jatqan «Ákimder mektebi» jobasy aıasynda Memlekettik qyzmet isteri agenttiginiń uıymdastyrýymen Astana qalasynda «Saparbaev tulǵasy» atty kitaptyń tusaýkeseri ótken bolatyn. Bul — elge qyzmet etýdi ómirlik muratyna aınaldyrǵan ardaqty azamattyń ónegeli jolyn beıneleıtin taǵylymdy týyndy. Qarapaıymdylyq pen adamgershilikti, kisilik pen kishilikti, talapshyldyq pen ádildikti bir boıyna syıdyrǵan ardaqty azamattyń esimi Táýelsiz Qazaqstannyń tarıhyna altyn árippen jazyldy. Ýaqyt ony aramyzdan alystatqanymen, rýhanı murasy eshqashan joǵalmaıdy, — dedi Murat Nálqojauly.
Basqosýda kitaptyń qurastyrýshysy Abaı Seıfýllauly, el aǵalary Samurat Imandosov, Bekmyrza Elamanov, Murat Baqtııaruly, oblystyq qoǵamdyq damý basqarmasynyń basshysy Rýslan Kaıýpov sóz sóıledi.
Berdibek Mashbekuly memlekettik qyzmettiń túrli satylarynda abyroıly eńbek etip, syndarly kezeńde halyq pen bılik arasyndaǵy ózara túsinistik pen senimdi nyǵaıtty. Eńbek jáne halyqty áleýmettik qorǵaý mınıstri, Premer-mınıstrdiń orynbasary, Qyzylorda, Ońtústik jáne Shyǵys Qazaqstan, Aqtóbe, Jambyl oblystarynyń ákimi retinde el damýyna zor úles qosty.
