Qyzylordada baspana alýǵa nesıe beretin baǵdarlamaǵa qujat qabyldaý bastaldy
QYZYLORDA. KAZINFORM - Qyzylorda oblysynyń jastaryna jeńildetilgen shartpen ıpotekalyq nesıe berý maqsatynda «Syr jastary» baǵdarlamasy iske qosyldy. Bul týraly oblystyq qoǵamdyq damý basqarmasynyń basshysy Rýslan Kaıýpov málimdedi.
Onyń aıtýynsha, baǵdarlamaǵa qatysýshylar búginnen bastap ótinish pen qujattaryn elektrondy túrde kezekte.kz saıtyna tirkep, «Jumys isteıtin jastarǵa arnalǵan «SyrJastary» jeńildetilgen ıpotekalyq nesıe berý» servısinde júzege asyra alady.
- Baǵdarlamanyń jalpy quny — 1 mlrd 700 mln teńge. Onyń 1 mlrd 200 mln teńgesi oblystyq bıýdjetten bıýdjettik nesıe retinde bólinse, 500 mln teńge «Otbasy banki» arqyly qarastyrylyp otyr. Byltyr bul baǵdarlama aıasynda 100 jas baspanaly boldy. Baǵdarlamaǵa usynysty 15 kúntizbelik kún ishinde berýge bolady, ıaǵnı naýqan búgin bastalyp, 24 qyrkúıekte aıaqtalady. Odan keıin jınalǵan ball sany boıynsha ár sanattaǵy eń kóp ball jınaǵan qatysýshylar irikteledi. Olarǵa elektrondy joldama beriledi. Joldama alǵan jastar «Otbasy bankinde» tólem qabilettiligin rastaıdy, sodan keıin kelisim-shart rásimdelip, úı tabystalady. Baǵdarlama aıasynda qalanyń sol jaǵalaýynda ornalasqan jalpy kólemi 49 jáne 66 sharshy metrden kem emes 2-3 bólmeli páterden berý josparlanǵan, - dedi basqarma basshysy.
Jastar suraq týyndaǵan jaǵdaıda basqarmaǵa (tel.: 60-53-23) júgine alady. Jergilikti jastar resýrstyq ortalyqtarynda da keńes, qujat usynýǵa kómek alý múmkindigi qarastyrylǵan.
Al keshe Májilis depýtaty Serik Egizbaev Premer-mınıstr Oljas Bektenovtiń atyna saýal joldap, 1%-dyq aýyl ıpotekasyn iske qosýdy usyndy.
