Qyzylordada balyq aýlaýǵa ýaqytsha tyıym salyndy

QYZYLORDA. KAZINFORM — 1 sáýirden bastap Qyzylorda oblysynda «Ýyldyryq shashý» aktsııasy bastaldy.

Osylaısha Aral-Syrdarııa basseıniniń sý aıdyndarynda balyq aýlaýǵa ýaqytsha tyıym salyndy. Aral-Syrdarııa oblysaralyq basseındik balyq sharýashylyǵy ınspektsııasy bul is-sharany balyqtardyń ýyldyryq shashý jáne sý bıoresýrstaryn kóbeıtý kezeńiniń bastalýyna baılanysty qolǵa alyp otyr.

— Onyń ishinde «Shardara» sý qoımasynyń sý aılaǵynda 1 sáýir-20 mamyr, Túrkistan oblysy shegindegi sý aıdyndarynda jáne «Shardara» sý qoımasynan Qyzylorda oblysynyń ákimshilik shekarasyna deıingi Syrdarııa ózeninde 15 sáýir-31 mamyr, saǵadan Túrkistan oblysynyń ákimshilik shekarasyna deıingi Syrdarııa ózeninde 1 sáýir-30 mamyr aralyǵynda balyq aýlaýǵa bolmaıdy. Al Kishi Aral teńiziniń sý aılaǵynda 1 mamyrdan 10 maýsymǵa, Qyzylorda oblysynyń shegindegi sý aıdyndarynda 20 sáýirden 10 maýsymǵa deıin jaǵdaı baqylaýymyzda bolady, — dedi ınspektsııa basshysynyń orynbasary Janqoja Saparov.

Aktsııa aıasynda reıdtik is-sharalar, sý aıdyndarynyń monıtorıngi jáne tabıǵat qorǵaý zańnamasynyń saqtalýyn tekserý josparlanǵan.

Aıta ketelik Qazaqstanda «Ýyldyryq shashý» keń aýqymdy balyq qorǵaý aktsııasy bastalatyny týraly habarlaǵan edik.