Qyzylordada balany ıt talap tastaı jazdady

QYZYLORDA. KAZINFORM — Áleýmettik jelide Qyzylorda qalasynda kishkentaı balany ıt talaı jazdaǵan beınejazba tarady. 

Onda jaǵdaıdyń keshe keshkilik oblys ortalyǵyndaǵy botanıkalyq baqta bolǵany kórsetilgen. «Iesimen júrgen ıt eken, ıesi qashyp ketipti» delingen jazbada.

Vıdeodan balany qaraýsyz júrgen ıttiń qapqany, sol kezde egde jastaǵy kisiniń qorǵap qalǵanyn baıqaýǵa bolady. 

Bul týraly oblystyq polıtsııa departamenti túsinikteme berdi. 

— Atalǵan jarııalanym boıynsha qalalyq polıtsııa basqarmasynyń ýchaskelik polıtsııa ınspektorlary tekserý jumysyn júrgizip jatyr. It ıesi anyqtalǵan jaǵdaıda úı janýarlaryn ustaý jáne serýendetý erejelerin buzǵany úshin Ákimshilik quqyqbuzýshylyq týraly kodekstiń 407-2 babynyń 1-bóligi 4-tarmaǵy boıynsha ákimshilik shara qoldanylady, — delingen habarlamada. 

Buǵan deıin Instagram áleýmettik jelisinde Qyzylorda qalasyndaǵy úılerdiń biriniń aýlasynda 20-dan astam ıt pen mysyqtyń óli kúıinde tabylǵany týraly beınejazba taraǵan edi.