Qyzylordada balalar úıiniń túlegi 17 jyl burynǵy turǵyn úı alý quqyǵyn qalpyna keltirdi

ASTANA. KAZINFORM – Qyzylorda oblysynyń turǵyny, A.Makarenko atyndaǵy balalar úıinde 1996-2008 jyldary tárbıelengen áıel sot arqyly memlekettik turǵyn úı qorynan baspana alý quqyǵyn dáleldedi.

Internattan keıin ol uzaq ýaqyt alys týystarymen saıajaıda turǵan. 2016 jyly turmysqa shyǵyp, ul bosanǵan, keıin balasy densaýlyǵyna baılanysty 3-toptaǵy múmkindigi shekteýli dep tanyldy. Ajyrasqannan keıin áıel burynǵy kúıeýiniń qoldaýynsyz, balasyn jalǵyz ózi tárbıelep keledi. Balalar úıiniń túlegi retinde memlekettik turǵyn úı qorynan baspana alý quqyǵy baryn bilmegen.

- Turǵyn úı ınspektsııasy bóliminen baspanaǵa tirkeýden bas tartý týraly habarlama alǵan soń, ol sotqa júgingen. Birinshi satydaǵy sot ótinish berýshini «jetim balalar, ata-anasynyń qamqorlyǵynsyz qalǵan balalar» sanaty boıynsha turǵyn úıge muqtaj dep ýaqtyly esepke almaǵan ýákiletti organdardyń áreketsizdigin anyqtady, - delingen Joǵarǵy sot taratqan aqaparatta.

Sot áıeldiń halyqtyń áleýmettik osal toptaryna jatatynyn jáne memlekettik turǵyn úı qorynan baspana alýǵa quqyǵy bar ekenin kórsetti. Quqyqtyq qatynas mektepti bitirip, attestat alý kezinde – 2008 jylǵy 20 maýsymda týyndaǵan dep tanyldy.

Talap qoıý qanaǵattandyrylyp, sot onyń kórsetilgen kúnnen bastap turǵyn úı kitabyna tirkelý quqyǵyn moıyndady. Qyzylorda qalasynyń ákimine jáne qalalyq turǵyn úı ınspektsııasy bólimine talap qoıýshyny tıisti túrde tirkeýdi qamtamasyz etý tapsyryldy.

Sot sheshimi zańdy kúshine endi.

Aıta keteıik, Baıqońyrda qurylysy aıaqsyz qalǵan 5 turǵyn úıdiń merdigeri aýysty.