Qyzylordada balalar úıinde ósken áıel turǵyn úı alý quqyǵyn sot arqyly dáleldedi
ASTANA. KAZINFORM – Qyzylorda qalasynyń turǵyny, balalar úıinde tárbıelengen áıel memlekettik turǵyn úı qorynan baspana alý quqyǵyn qaıtaryp aldy.
Sot materıaldaryna sáıkes, ol 2016 jyly áleýmettik osal top ókili retinde «tolyq emes otbasy» sanatynda kezekke qoıylǵan. 2024 jyly Qyzylorda qalasy ákimdiginiń turǵyn úı ınspektsııasyna 1998 jyldyń 1 qyrkúıeginen bastap «jetim jáne ata-anasynyń qamqorlyǵynsyz qalǵan balalar» sanatynda esepke qoıý týraly ótinish bergen. Bul sanat oǵan balalar úıi túlekterine beriletin memlekettik baspanaǵa úmitker bolýǵa múmkindik beredi.
Alaıda turǵyn úı ınspektsııasy onyń ótinishin qanaǵattandyrýdan bas tartqan.
- Talapker óz ótinishinde buǵan deıin birneshe ret ýákiletti organǵa júgingenin, balalar úıinde tárbıelengenin, alaıda tıisti kómekti ala almaǵanyn kórsetken. 1998 jyly balalar úıinen shyqqannan keıin ol jyldar boıy jaldamaly úıde turýǵa májbúr bolǵan.
Keıinirek ol balalar úıiniń túlekteri baspana alýǵa quqyly ekenin bilip, 1998 jyldan bastap osy sanatta tirkelý quqyǵyn tanýdy talap etti, - dep jazady Astana sottarynan.
Sot óziniń sheshiminde azamattardy turǵyn úımen qamtamasyz etý – Konstıtýtsııada bekitilgen memlekettiń negizgi mindetteriniń biri ekenin atap ótti. Áleýmettik osal toptardy qoldaý úshin arnaıy tetikter qarastyrylǵan, oǵan talapker de kiredi. Balalar úıinen shyqqannan keıin onyń baspana alýǵa tolyq quqyǵy bolǵan, alaıda tıisti qujattardyń ýaqytyly rásimdelmeýi balalar úıi men bilim bólimi tarapynan áreketsizdikke jol berilgenin kórsetedi.
Іs materıaldaryn zerdeleı kele, sot bul jaǵdaılar talapkerdiń áleýmettik jáne materıaldyq múddelerine aıtarlyqtaı áser etkenin, onyń zańdy quqyqtaryn júzege asyrýyna kedergi bolǵanyn anyqtady.
Sot sheshimimen ýákiletti organǵa áıeldi 1998 jyldyń 1 qyrkúıeginen bastap turǵyn úıge muqtaj adamdar tizimine qoıý mindetteldi.
Aıta keteıik, buǵan deıin de osy aımaqta balalar úıiniń túlegi 17 jyldan keıin turǵyn úı kezegine qaıta turǵyzylǵany habarlanǵan bolatyn.