Qyzylordada balalar qaýipsizdigi úshin turǵyn úılerge 183 tereze blokıratory ornatyldy
QYZYLORDA. KAZINFORM – Jyl basynan beri Qyzylorda oblysynda balalar terezeden qulap ketken 8 oqıǵa tirkeldi.
Qutqarýshylar jaz mezgilinde balalar qaýipsizdigi ózekti máselege aınalatynyna alańdaýly.
- Bul jaǵdaılardyń basty sebebi – balalardy baqylaýsyz qaldyrý, terezelerde arnaıy qorǵanys qurylǵylarynyń bolmaýy jáne balalardyń tereze mańynda oınaýy. Balalardyń qaýipsizdigin qamtamasyz etý maqsatynda júıeli profılaktıkalyq jumys atqarylyp keledi. Jyl basynan beri uıymdastyrylǵan túsindirý sharalaryna 5700-den astam turǵyn tartyldy. Budan bólek, mektep oqýshylary arasynda qaýipsizdik mádenıetin qalyptastyrý maqsatynda qosymsha kezdesýler ótkizdik, - dedi oblystyq Tótenshe jaǵdaılar departamentiniń basqarma bastyǵy Ashat Orazbekov.
Balalardyń terezeden qulaý oqıǵalaryn azaıtý úshin turǵyn úılerge arnaıy qorǵanys qurylǵylary ornatylyp jatyr.
- Osy jyldyń ózinde departament tarapynan turǵyn úılerdiń terezelerine 183 blokırator ornatyldy. Mundaı qurylǵylar balalardyń terezeni ózdiginen ashýyna múmkindik bermeıdi jáne qaýiptiń aldyn alýǵa kómektesedi. Qaıǵyly jaǵdaılardyń basym bóligi eresekterdiń salǵyrttyǵynan tirkelgen. Sondyqtan ata-analar men qamqorshylardy balalardyń qaýipsizdigine erekshe kóńil bólýge shaqyramyn, – dedi departament ókili.
Buǵan deıin Astananyń balalar hırýrgi Dınat Qojekenov mundaı oqıǵalardyń saldary qandaı bolatynyn, nelikten masaǵa qarsy torǵa súıenýge bolmaıtynyn jáne balalardy jazataıym jaǵdaıdan qalaı qorǵaýǵa bolatynyn túsindirgen edi.
