Qyzylordada balabaqsha tárbıelenýshileri mingen kólik apatqa ushyrady

QYZYLORDA. KAZINFORM – Qyzylorda qalasynda jeke balabaqsha tárbıelenýshileri mingen kólik qoǵamdyq kólikpen soqtyǵysty. Bul týraly qalalyq bilim bóliminen habarlady.

Oqys oqıǵa keshe, ıaǵnı 1 shilde kúni tańǵy saǵat 8-ge taman bolǵan. Balalar mingen kólik balabaqshanyń tasymal kóligi emes. Ony balabaqshada tárbıeshiniń kómekshisi bolyp jumys isteıtin mamannyń joldasy basqarǵan. 

– Jol-kólik oqıǵasy saldarynan tárbıelenýshiler aýyr halde balalar aýrýhanasynyń jansaqtaý bólimine tústi. Olardyń biri apparatqa qosylǵan, endi biri reanımatsııa bóliminde baqylaýda. Jeke kólik júrgizýshisi oblystyq kópbeıindi aýrýhananyń travmotologııa bóliminde jatyr. Tárbıeshiniń kómekshisi osy aýrýhananyń jansaqtaý bóliminde, - delingen qalalyq bilim bóliminiń habarlamasynda. 

Atalǵan vedomstvo ókilderi jeke balabaqshaǵa jospardan tys monıtorıng júrgizilip, tıisti shara qabyldanatynyn atap ótti. 

Jol apatyna baılanysty oblystyq polıtsııa departamenti túsinikteme berdi. 

– Adamdardyń densaýlyǵyna aýyr zııan keltirýge ákep soqqan jol júrisi qaǵıdalaryn buzý deregi boıynsha tergeý áreketi júrgizilip jatyr. Tergeý qorytyndysymen tıisti protsessýaldyq sheshim qabyldanady, - delingen polıtsııa habarlamasynda. 

Tártip saqshylary osy oraıda júrgizýshilerdi jol erejesin qatań saqtaýǵa shaqyrdy. 

Buǵan deıin biz Qyzylorda oblysy Shıeli aýdanynyń Bala bı aýylyndaǵy jaýyzdyq áreket – áıeliniń beti-qolyn baltamen shabý deregi boıynsha sot úkimi shyqqanyn jazǵanbyz.