Qyzylordada ázirge tek 104 úıge ystyq sý keldi

QYZYLORDA. KAZINFORM – Qyzylorda qalasyndaǵy otyz jyldan beri sý jylytqysh paıdalanyp úırengen 100-den astam kópqabatty úı turǵyndary qazir ystyq sýdyń rahatyn kórip otyr. 

Oblys ortalyǵyndaǵy 185 baspananyń máselesin sheshý byltyr bastaldy. Úkimet rezervinen oǵan 11 mlrd teńge bólinip, jumysty júzege asyrýshy operator bolyp «Baıqońyr» áleýmettik-kásipkerlik korporatsııasy bekitildi. Osylaısha búginde qaladaǵy 104 úıge ystyq sý jetkizildi. 

– Qalǵan 85 úıdiń ójirelerine qubyr tartyldy. Endi tek páterlerge eseptegish quraldar men tireýishter ornatý qaldy. Jalpy, bul másele bir aıdan astam ýaqyt ishinde tolyǵymen sheshiledi dep otyrmyz, - dedi «Baıqońyr» ÁKK basqarma tóraǵasynyń keńesshisi Muhıtjan Kárimbaev. 

Mamandardyń esebinshe, páterdi ystyq sý júıesine qosý tutynýshynyń qaltasyn aıtarlyqtaı qaqpaıdy. Elektrli sý jylytý qondyrǵysy ekeýiniń aıyrmashylyǵy 1035,94 teńge shamasynda, ıaǵnı 66,2% tıimdirek.

– Turǵyndar ystyq sýdy qysy-jazy paıdalana alady. Sondyqtan qala turǵyndary múmkindikti paıdalanyp, ortalyqtandyrylǵan ystyq sý júıesine qosylǵany durys, - dedi Muhıtjan Kárimbaev.

Eske salaıyq, Qyzylorda osyǵan deıin elimizdegi ystyq sý joq jalǵyz oblys ortalyǵy bolatyn.