Qyzylordada azyq-túlik baǵasyn negizsiz kóterýdiń 30 deregi anyqtaldy
QYZYLORDA. KAZINFORM – Áleýmettik mańyzy bar azyq-túlik baǵasyn turaqtandyrý jáne qadaǵalaý Qyzylorda oblystyq ekonomıkalyq tergep-tekserý departamenti jumysyndaǵy negizgi baǵyttardyń biri sanalady.
Oblys bıýdjetin tıimdi ári ornymen paıdalaný maqsatynda departament mamandary ótken jyly 2 áleýmettik jobanyń smetalyq qujattamasynan baǵa kóterý faktilerin anyqtady. Jobalar quny qaıta qaraldy.
– Nátıjesinde 800 mln teńgeden astam bıýdjet qarjysy únemdeldi. Ol halyqtyń áleýmettik qajettiligine baǵyttaldy. Mundaı is-sharalar oblystyń qarjylyq tártibin kúsheıtýge jáne áleýmettik bastamalardy qoldaýǵa múmkindik berdi. Sonymen qatar áleýmettik mańyzy bar azyq-túlik taýarlarynyń saýda ústeme baǵasyn negizsiz kóterý boıynsha 30 derek tirkeldi. Kinálilerge quqyq buzý quramynyń bolmaýyna baılanysty ákimshilik shara qoldanyldy, - delingen departament habarlamasynda.
Tarıf qalyptastyrýda da kemshilik kezdesti. «QazTransGaz Aımaq» AQ Qyzylorda fılıaly 30 myńnan astam tutynýshydan gaz taratý jelisine alǵash ret qosylǵany úshin zańsyz abonenttik tólem alǵan. Onyń jalpy somasy 193 mln teńge boldy. Kompanııa bul qarajatty tutynýshylardyń jeke esepshotyna qaıtara bastady.
– Qylmystyq is aıasynda temeki ónimderin satý boıynsha 7 nysanda tintý júrgizildi. 939 veıp, 1840 temeki buıymy jáne ózge de zattaı dáleldemeler tárkilendi, - delingen habarlamada.
Mádenıet jáne sport salasyndaǵy «Art-sport» baǵdarlamasy aıasynda qylmystyq is qozǵalyp, tergep-tekserý arqyly 15 mlrd teńgeden astam bıýdjet qarajaty únemdeldi.
Buǵan deıin biz elimizde azyq-túlik taýarlarynyń baǵasy ótken jyldyń deńgeıinde saqtalǵanyn habarladyq.