Qyzylordada aıyppuldyń qomaqty bóligi jol erejesin buzǵandarǵa salynǵan
QYZYLORDA. KAZINFORM – Bıyl 6 aıda Qyzylorda oblysynda jolda júrý erejesin buzýdyń 174 443 deregi anyqtaldy.
Oblystyq polıtsııa departamentiniń málimetinshe, onyń 99 623-i nemese 57,1%-y – jol apatyna tikeleı áser etetin óreskel quqyqbuzýshylyqtar.
– Jol-kólik oqıǵalarynyń sany 6,4%-ǵa, qaza tapqandar 2%-ǵa, jaraqat alǵandar sany 7,5%-ǵa tómendedi. Taldaý nátıjesi júrgizýshilerdiń jolda júrý erejesin saqtamaýy qaıǵyly oqıǵalarǵa áser etetinin kórsetti. Mysaly, kólikti masań kúıde basqarýdyń – 425, qarsy baǵytqa shyǵýdyń – 194, jyldamdyqty asyrýdyń – 69 993, uıaly telefon qoldanýdyń – 5907, jaıaý júrginshige jol bermeýdiń 5505 deregi anyqtalǵan, – delingen habarlamada.
Aıyppuldyń qomaqty bóligi de osylardyń enshisinde. Ákimshilik quqyq buzǵandarǵa 2 mlrd 822 mln teńgege jýyq aıyppul salynsa, sonyń 2 mlrd 468,5 mln teńgeden astamy jol qaýipsizdigi salasyna tıesili. Onyń 83,3%-y óndirilgen.
Aıta keteıik, keshe ǵana Atyraý oblysynda Toyota Sienna men Lada Granta avtokólikteri soqtyǵysyp, bir adam kóz jumdy.
